បរទេស៖ ទីបំផុត រង់ចាំអស់រយៈពេលជិត១ទសវត្សរ៍របស់សិង្ហបុរី បានបញ្ចប់ហើយ ខណៈដែលពួកគេបានកក់កៅអីរបស់ពួកគេក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ AFF Suzuki Cup ឆ្នាំ២០២០ កាលពីថ្ងៃអង្គារ។
ក្រុមសិង្ហបុរី បានធ្លាក់ចេញនៅលើទឹកដីខ្លួនឯងក្នុងឆ្នាំ២០១៤ មុននឹងបន្តធ្លាក់ចេញត្រឹមតែចែកពូលទៀត ក្រោយពីមិនស្គាល់ឈ្នះសោះក្នុងឆ្នាំ២០១៦ ក៏ដូចជាជួបការខកចិត្តទៀតក្នុងឆ្នាំ២០១៨។ ប៉ុន្តែដោយសារតែថៃ បានយកឈ្នះលើក្រុមជម្រើសជាតិហ្វីលីពីន ២-១ ក្នុងការប្រកួត១គូមុន កាលពីថ្ងៃអង្គារ ក្រុមជម្រើសជាតិសិង្ហបុរី មិនចាំបាច់ត្រូវរង់ចាំការប្រកួតក្នុងពូលរបស់ខ្លួនពេលប៉ះទីម័រខាងកើតឡើយ ខណៈដែលការដណ្តើមបានជ័យជម្នះរបស់ពួកគេលើក្រុមជម្រើសជាតិមីយ៉ាន់ម៉ា និងហ្វីលីពីន បានគ្រប់គ្រាន់ហើយសម្រាប់ពួកគេក្នុងការទៅវគ្គបន្ត។
ប៉ុន្តែ ក្រុមជម្រើសជាតិសិង្ហបុរី បានបញ្ចប់ភាពស្រពេចស្រពិលនានា តាមរយៈការផ្តួលក្រុមជម្រើសជាតិទីម័រខាងកើត ២-០។ បច្ចុប្បន្ន ថៃ និងសិង្ហបុរី មាន៩ពិន្ទុដូចគ្នា ពីការប្រកួត៣លើកក្នុងពូល ហេតុនេះ គោលដៅចម្បងរបស់ក្រុមទាំង២នៅពេលនេះ គឺការប្រជែងដណ្តើមលេខ១ក្នុងពូល A ក្រោយពីមានសុវត្ថិភាពក្នុងការទៅវគ្គបន្តរួចជាស្រេច៕
ប្រភពព័ត៌មាន៖ Channel News Asia