ដូចអ្វីដែលបានសន្យា ក្លិបបាល់ទាត់ភ្នំពេញក្រោន ដែលមានលោក ឬទ្ធី សំណាង ជាប្រធាន បាននាំយកថវិកាមួយផ្នែក នៃប្រាក់រង្វាន់ ដែលទទួលបានពីការឈ្នះតំណែងជើងឯកលីគកំពូលកម្ពុជា ឆ្នាំ២០២១ ទៅប្រគល់ជូនដល់ «មូលនិធិគន្ធបុប្ផាកម្ពុជា» ដើម្បីគាំទ្រដល់សកម្មភាពសង្គ្រោះជីវិតកុមារ នៅកម្ពុជា របស់មន្ទីរពេទ្យគន្ធបុប្ផា ទាំងប្រាំទីតាំង។
តាមព័ត៌មាន ដែលត្រូវបានបង្ហោះ នៅលើផេចហ្វេសប៊ុករបស់ក្លិបនេះផ្ទាល់ បានឱ្យថាគណៈគ្រប់គ្រងក្លិបបាល់ទាត់ភ្នំពេញក្រោន រួមជាមួយកីឡាករ កីឡាការិនី និងតំណាងក្រុមហ៊ុន Pi Pay កាលពីរសៀលថ្ងៃព្រហស្បតិ៍ ម្សិលមិញ បាននាំមកនូវថវិកាចំនួន៤០លានរៀល ដែលជាចំណែកប្រាក់រង្វាន់ នៃការឈ្នះជើងឯកលីគកំពូលកម្ពុជា ឆ្នាំ២០២១ បរិច្ចាគជូន «មូលនិធិគន្ធបុប្ផាកម្ពុជា – Cambodia Kantha Bopha Foundation» ក្នុងគោលបំណងសម្រាលការលំបាក ក៏ដូចជាគាំទ្រដល់សកម្មភាពសង្គ្រោះជីវិតកុមារ នៅកម្ពុជា របស់មន្ទីរពេទ្យគន្ធបុប្ផាទាំង៥ ទីតាំង។
នៅក្នុងឱកាសនោះដែរ លោកបណ្ឌិត ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការដ្ឋានមូលនិធិគន្ធបុប្ផាកម្ពុជា បានសម្តែងការកោតសរសើរក្លិបភ្នំពេញក្រោន ចំពោះការយកចិត្តទុកដាក់ និងរួមចំណែកក្នុងសកម្មភាពពិនិត្យ និងព្យាបាលកុមារ និងទារក បន្ថែមពីលើបេសកកម្ម នៃការចូលរួមអភិវឌ្ឍវិស័យបាល់ទាត់ជាតិ ទាំងផ្នែកយុវជន ក្រុមបុរស និងក្រុមនារី។
ចំណែកលោក លី ហៀង អគ្គលេខាធិការក្លិបបាល់ទាត់ភ្នំពេញក្រោន បានលើកឡើងថា ៖ «ថ្វីត្បិតតែថវិកា នាថ្ងៃនេះ មានចំនួនមិនច្រើនក្តី ក៏វាជាស្មារតីមួយក្នុងការបង្ហាញថា ជ័យជម្នះរបស់យើង គឺជាក្តីរីករាយ សម្រាប់មនុស្សគ្រប់ៗគ្នា ជាពិសេសកុមារ ដែលកំពុងត្រូវការការគាំពារសុខុមាលភាពរបស់ពួកគេ ក្នុងនាមជាអ្នកជំនាន់ក្រោយ និងជាធនធាន សម្រាប់សង្គមជាតិនាពេលអនាគត»។
ជាមួយគ្នានោះ លោកវេជ្ជបណ្ឌិត ដេនីស ឡូរ៉ង់ (Denis Laurent) អគ្គនាយកមន្ទីរពេទ្យគន្ធបុប្ផា បានបញ្ជាក់ថា ថវិកាទាំងនេះ នឹងប្រើប្រាស់ប្រកបដោយប្រសិទ្ធភាព ក្នុងការរក្សាបាននូវគុណភាព និងចីរភាពនៃការពិនិត្យ និងព្យាបាលកុមារ នៅកម្ពុជា ដូចអ្វីដែលមន្ទីរពេទ្យគន្ធបុប្ផាទាំង៥ ទីតាំងតែងតែប្រកាន់ខ្ជាប់ នារយៈពេលជាច្រើនឆ្នាំមកនេះ។
គួរបញ្ជាក់ថា “មូលនិធិគន្ធបុប្ផាកម្ពុជា” ដែលលោកនាយករដ្ឋមន្រ្តី ហ៊ុន សែន នាយករដ្ឋមន្ត្រី និងលោកស្រីកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ជាប្រធានកិត្តិយស ត្រូវបានដាក់ឱ្យដំណើរការជាផ្លូវការ កាលពីថ្ងៃទី១១ ខែមេសា ឆ្នាំ២០១៨ ក្នុងគោលបំណងកៀរគរនូវអំណោយឧបត្ថម្ភធន និងវិភាគទានពីប្រភពស្របច្បាប់នានា សំដៅធានាចីរភាពនៃកិច្ចដំណើរការរបស់មន្ទីរពេទ្យគន្ធបុប្ផាទាំង៥ទីតាំង បន្ថែមពីលើ “មូលនិធិគន្ធបុប្ផាប្រទេសស្វីស” ដែលបានបង្កើតឡើងដោយលោកសាស្ត្រាចារ្យវេជ្ជបណ្ឌិត BEAT RICHNER៕