ក្រុមជើងឯកលីគកំពូលកម្ពុជា ភ្នំពេញក្រោន បានជួបការបរាជ័យ ចំពោះការសាកល្បង ក្នុងការដាក់ក្រុមកីឡាករវ័យក្មេងរបស់ខ្លួន ឱ្យចូលលេង នៅក្នុងជម្រើស១១នាក់ដំបូង នៅពេលពួកគេ ប្រកួតដណ្តើមពានអន្តរជាតិ International Club Friendly Match 2022 ជាមួយក្រុមទី២របស់ក្លិប Terengganu ឬ Terengganu 2 កាលពីយប់ថ្ងៃចន្ទ។
តាមរយៈការប្រកួតដណ្តើមពានអន្តរជាតិ ជាលើកទី២ កាលពីយប់ម្សិលមិញនេះ គ្រូបង្គោលរបស់ក្រុមភ្នំពេញក្រោន លោក Oleg Starynskyi មិនបានប្រើសមាភាពជម្រើស១១នាក់ដំបូង ដូចពេលដែលពួកគេ បានប្រកួតស្មើ ១-១ ជាមួយក្រុមធំរបស់ Terengganu កាលពីថ្ងៃសៅរ៍នោះទេ។
ផ្ទុយទៅវិញ គ្រូបង្គោលសញ្ជាតិអ៊ុកក្រែនរូបនេះ បានសម្រេចដាក់កីឡាករល្អៗ ជាពិសេសកីឡាករបរទេស ឱ្យស្ថិតនៅក្នុងបញ្ជីឈ្មោះបម្រុងទាំងអស់ និងបានបញ្ចូលក្រុមកីឡាករវ័យក្មេងកម្ពុជា ទាំង១១នាក់ ឱ្យចូលលេង នៅក្នុងជម្រើសដំបូង ហើយក្រុមនេះ មិនអាចរកបានគ្រាប់បាល់នោះទេ តែក៏មិនបណ្តោយឱ្យក្រុម Terengganu 2 រកបានគ្រាប់បាល់ នៅតង់ទី១ ដូចគ្នា។
តែទោះបីជាយ៉ាងណា ឈានចូលនៅតង់ទី២ អ្វីៗបានប្រែប្រួល នៅពេល ភ្នំពេញក្រោន បានបង្កើនការវាយលុក បន្ទាប់ពីក្រុមមួយនេះ បានផ្លាស់ប្តូរបេក្ខភាព៣នាក់ ដែលក្នុងនោះក៏មានខ្សែបម្រើកូឡុំប៊ី Neito ផងដែរ ហើយជាមួយការផ្លាស់ប្តូររបៀបលេងលេងនេះ ក្រុម Terengganu 2 បែរជាធ្វើបានល្អ ជាមួយការវាយបករបស់ពួកគេ ដោយពួកគេ អាចរកបាន២គ្រាប់ជាប់ៗគ្នា នៅនាទីទី៥៨ និង ៦៨ ដែលគ្រាប់បាល់ទាំង២នេះ បានកើតឡើង ដោយការធ្វេសប្រហែសរបស់ខ្សែការពាររបស់ភ្នំពេញក្រោន។
បន្ថែមលើការនាំមុខ ២-០ នេះ Terengganu 2 បានប្រើក្បាច់វាយបកនេះដដែល ដើម្បីរកបានគ្រាប់បាល់ទី៣ នៅនាទីទី៨០ ហើយខ្សែការពារជប៉ុន Yudai ដែលទើបដាក់ឱ្យចូលលេងនោះ បានត្រឹមរត់តាមពីក្រោយ និងមើលការស៊ុតបាល់បញ្ចូលទីដ៏ល្អរបស់ខ្សែប្រយុទ្ធ ក្រុម Terengganu 2 ប៉ុន្តែនៅនាទីទី៨៦ កីឡាករវ័យក្មេង រ៉ូហ្សាក់ ដែលដាក់ឱ្យចូលលេង នៅតង់ទី២ ដែរនោះ បានស៊ុតទម្លុះសំណាញ់ទីក្រុមម្ចាស់ផ្ទះបានសម្រេច ដើម្បីធ្វើឱ្យការប្រកួតនេះ បញ្ចប់ដោយ ភ្នំពេញក្រោន ចាញ់ ៣-១។
យ៉ាងណាក៏ដោយ ការចាញ់ក្រុម Terengganu 2 ដោយលទ្ធផល ៣-១ នេះ វាមិនបានដាក់សម្ពាធទៅដល់ក្រុមភ្នំពេញក្រោន នៅមុនពេលពួកគេ ត្រូវប្រកួតមិត្តភាពជាមួយក្រុមខ្លាំងរបស់ម៉ាឡេស៊ី Kuala Lumpur City នៅថ្ងៃពុធ ស្អែកនេះទេ ព្រោះវាគ្រាន់តែជាការផ្តល់ឱកាសឱ្យកីឡាករវ័យក្មេងរបស់ភ្នំពេញក្រោន បានលេង និងបានពង្រឹងសមត្ថភាព ព្រមទាំងត្រៀមខ្លួនបានកាន់តែប្រសើរ សម្រាប់ចូលរួមប្រកួតប្រជែង នៅលីគកំពូលកម្ពុជា ជាពិសេសការប្រកួតជម្រុះក្នុងពូលD នៃពានរង្វាន់ AFC Cup 2022 ដែលត្រូវធ្វើនៅប្រទេសវៀតណាម នាពេលខាងមុខនេះ៕
