កីឡាកររបស់កូឡុំប៊ី Andres Nieto និងកីឡាករជប៉ុន Yudai Ogawa សុទ្ធតែបានតាំងចិត្តខ្លាំងថា នឹងខិតខំប្រឹងប្រែងនាំយកជ័យជម្នះថ្មីៗបន្ថែមទៀត មកជូនដល់ក្រុមភ្នំពេញក្រោន និងអ្នកគាំទ្រ បន្ទាប់ពីពួកគេ បានសម្រេចបន្តកុងត្រាថ្មីជាមួយក្រុមសិង្ហក្រហម រហូតដល់បញ្ចប់រដូវកាលឆ្នាំ២០២២នោះ។
ក្លិបភ្នំពេញក្រោន របស់លោកឧកញ៉ា ឬទ្ធី សំណាង បានប្រកាសពីការបន្តកុងត្រាដល់ខ្សែបម្រើប្រយុទ្ធជនជាតិកូឡុំប៊ី Andres Nieto និងកីឡាករជប៉ុន Yudai Ogawa កាលពីពេលថ្មីៗនេះ ដោយអ្នកទាំង២នេះ ជាកម្លាំងយ៉ាងសំខាន់ ដែលបានជួយឱ្យ ភ្នំពេញក្រោន លើកពានលីគកំពូលកម្ពុជា ឆ្នាំ២០២១នេះ។
កីឡាករជប៉ុន Yudai Ogawa បាននិយាយថា៖ «ខ្ញុំសប្បាយរីករាយ ដែលបានបន្តកុងត្រាជាមួយភ្នំពេញក្រោន ១ឆ្នាំទៀត។ យើងបានបង្កើតប្រវត្តិសាស្រ្តជាមួយគ្នា នៅរដូវកាលនេះ ហើយខ្ញុំសង្ឃឹមថា យើងនឹងបន្តជាមួយគ្នា ខ្ញុំនឹងព្យាយាមឱ្យអស់ពីសមត្ថភាព សម្រាប់ក្រុម និងអ្នកគាំទ្រ»។
ការបន្តចុះកុងត្រាថ្មីឱ្យ Andres Nieto និង Yudai Ogawa ត្រូវបានគេមើលឃើញថា ភ្នំពេញក្រោន ចង់រក្សាទុកអ្នកទាំង២នេះ មិនមែនតែសម្រាប់ការប្រកួតប្រជែង នៅក្នុងលីគកំពូលកម្ពុជាប៉ុណ្ណោះទេ ប៉ុន្តែសំខាន់បំផុត គឺត្រៀមការប្រកួតវគ្គជម្រុះពានរង្វាន់ AFC Cup។
ម្ចាស់អាវលេខ១០ ដែលមានទម្រង់លេងល្អជាងគេឱ្យក្រុមភ្នំពេញក្រោន សម្រាប់រដូវកាលឆ្នាំ២០២១ Andres Nieto បាននិយាយថា៖ «ខ្ញុំសប្បាយចិត្តជាខ្លាំង ដែលបានបន្ត១ឆ្នាំទៀត ជាមួយភ្នំពេញក្រោន។ យើងនឹងបន្តបង្កើតប្រវត្តិសាស្រ្តជាមួយគ្នាបន្ថែមទៀត ជាពិសេសនៅ AFC Cup»។
យ៉ាងណាក៏ដោយ ភ្នំពេញក្រោន បានប្រកាសចែកផ្លូវជាមួយប្រយុទ្ធប្រេស៊ីល Matheus S Silva ជាផ្លូវការហើយ ចំណែកបេក្ខភាពខ្សែការពារជាកីឡាករបរទេស២នាក់ទៀត ភ្នំពេញក្រោន នៅមិនទាន់ប្រកាសឱ្យដឹងនៅឡើយទេ គិតមកត្រឹមថ្ងៃនេះ៕
