ក្រុមការពារតំណែងជើងឯកលីគកំពូលកម្ពុជា ភ្នំពេញក្រោន បានស្ពាយបទពិសោធ ពីប្រទេសម៉ាឡេស៊ី មកដល់មាតុប្រទេសវិញហើយ ប៉ុន្តែក្រុមជើងឯករង ព្រះខ័នរាជស្វាយរៀង ទើបទៅដល់ប្រទេសមួយនេះ កាលពីម្សិលមិញ ដើម្បីធ្វើការប្រកួតមិត្តភាពអន្តរជាតិ ទាំងជាមួយក្រុមលីគកំពូល និងលីគទី២ របស់ម៉ាឡេស៊ី។
សម្រាប់ការចេញទៅប្រកួតមិត្តភាពអន្តរជាតិ នៅប្រទេសម៉ាឡេស៊ីនេះ ក្រុមភ្នំពេញក្រោន បានបញ្ចប់ការប្រកួតទាំង៣លើករបស់ខ្លួន ដោយរកមិនឃើញការឈ្នះសោះ គឺពួកគេ បានត្រឹមស្មើ ១-១ ជាមួយក្រុម Terengganu តែបានបាចាញ់ក្រុម Terengganu 2 ក្នុងលទ្ធផល ៣-១ និងបន្តចាញ់ក្រុមខ្លាំងរបស់ម៉ាឡេស៊ី Kuala Lumpur City រហូតដល់ ៥-១។
តែទោះបីជាយ៉ាងណា ភ្នំពេញក្រោន មិនផ្តោតសំខាន់ខ្លាំង ទៅដល់ការឈ្នះ ចាញ់ សម្រាប់ការចេញទៅប្រកួតនៅម៉ាឡេស៊ី នោះទេ ប៉ុន្តែអ្វីដែលសំខាន់ គឺពួកគេ ចង់ពង្រឹងសមត្ថភាព និងស្មារតីប្រកួត ឱ្យបានកាន់តែខ្លាំង ដើម្បីត្រៀមការប្រកួតជម្រុះវគ្គចែកពូល ពានរង្វាន់ AFC Cup 2022 ដោយ ភ្នំពេញក្រោន ត្រូវប្រកួតបើកឆាកប្រចាំពូល I នេះ ជាមួយក្រុម Houngang United នៅថ្ងៃទី២៤ រួចបន្តទៅជួបក្រុម Young Elephants របស់ឡាវ នៅថ្ងៃទី២៧ និងចុងក្រោយ ត្រូវប៉ះក្រុមម្ចាស់ផ្ទះវៀតណាម Viettel នៅថ្ងៃទី៣០ ខែមិថុនា។
យ៉ាងណាមិញ ក្រុមព្រះខ័នរាជស្វាយរៀង ទើបបានធ្វើដំណើរ ទៅដល់ប្រទេសម៉ាឡេស៊ី កាលពីថ្ងៃព្រហស្បតិ៍។ បើទោះបីជា ស្វាយរៀង មិនមានបេសកកម្ម ចេញទៅប្រកួតពាន AFC Cup ប៉ុន្តែការចេញទៅប្រកួតមិត្តភាពអន្តរជាតិ នៅក្រៅប្រទេសនេះ គឺស្វាយរៀង ចងើពង្រឹងគុណភាពរបស់ខ្លួន ឱ្យបានកាន់តែប្រសើរ ដើម្បីត្រៀមការប្រកួតដំណាក់កាលទី២ នៃលីគកំពូលកម្ពុជា ខណៈការប្រកួតចំនួន៧លើក ដំណាក់កាលទី១ កន្លងមកនេះ ស្វាយរៀង បាននឹងកំពុងឈរនៅលេខ១ ជាបណ្តោះអាសន្ន ដោយឈ្នះ៦ ស្មើ១ មាន១៩ពិន្ទុ ដាច់ពីគេតែម្តង។
សម្រាប់ការចេញដំណើរទៅប្រកួតមិត្តភាពអន្តរជាតិ MALAYSIA TOUR 2022 ដែលជាកិច្ចសហការជាមួយក្រុមហ៊ុន Echo Sports Management របស់ប្រទេសម៉ាឡេស៊ីនេះ ក្រុមស្វាយរៀង របស់កម្ពុជា នឹងត្រូវប្រកួតមិត្តភាពអន្តរជាតិ ជាមួយក្រុមលេងនៅលីគកំពូលម៉ាឡេស៊ី PJ City FC នៅថ្ងៃទី១០ មុនពេលពួកគេ ត្រូវប្រកួតជាមួយសមាជិកលីគ២ ម៉ាឡេស៊ី UiTM FC នៅថ្ងៃទី១៣ ខែមិថុនា ឆ្នាំ២០២២៕