បរទេស៖ ក្រុម Chelsea ត្រូវតែ «ស្វែងរកដំណោះស្រាយ» នៅលើទីលានប្រកួត បើទោះបីមិនក្រុមពេញកម្លាំងទាំងស្រុងក៏ដោយ។ នេះបើយោងទៅតាមការបញ្ជាក់របស់លោកគ្រូបង្វឹក Thomas Tuchel ស្របពេលដែលក្រុមមានមូលដ្ឋាននៅទីក្រុងឡុងដ៍មួយនេះ ត្រូវជួបកម្មវិធីប្រកួតដ៏មមាញឹក នៅចុងឆ្នាំ ក្នុងអំឡុងពេលដែលខ្វះកីឡាករ ដោយសារតែបញ្ហារបួស និងករណីឆ្លងកូវីដ ១៩។
Chelsea មានតែកីឡាករបម្រុងត្រឹមតែ៤នាក់ប៉ុណ្ណោះ ក្នុងពេលបញ្ចប់ក្នុងលទ្ធផលស្មើ ០-០ ជាមួយនឹងក្រុម Wolverhampton Wanderers ក្នុងការប្រកួតក្របខ័ណ្ឌ Premier League កាលពីថ្ងៃអាទិត្យ ក្រោយពីកីឡាករ៧នាក់ក្នុងក្រុមរបស់ពួកគេបានតេស្តឃើញលទ្ធផលវិជ្ជមានលើវីរុសកូរ៉ូណា។ ក្លិបជាច្រើនស្ថិតក្នុងក្របខ័ណ្ឌ Premier League បានមូលមតិគ្នាកាលពីថ្ងៃចន្ទថា នឹងបន្តលេងការប្រកួតរបស់ខ្លួនតាមការគ្រោងទុក អំឡុងពេលរដូវកាលបុណ្យទាន បើទោះបីការប្រកួតជាច្រើនត្រូវបានពន្យារពេល ដោយសារតែការផ្ទុះឡើងនូវករណីឆ្លងកូវីដ ១៩ ក៏ដោយ។ លោក Tuchel មិនខកចិត្តចំពោះការសម្រេចចិត្តនេះឡើយ។
នៅមុនពេលការប្រកួតពាន League Cup វគ្គ៨ក្រុមចុងក្រោយនៅលើទឹកដីក្រុម Brentford លោក Tuchel បានឲ្យដឹងថា៖ «ខ្ញុំមិនមានដំណោះស្រាយសម្រាប់ការប្រកួតលីក និងកម្មវិធីប្រកួតទាំងមូលឡើយ។ ប៉ុន្តែ ការសម្រាកគ្រាន់តែជាការពន្យារពេលនូវបញ្ហាប៉ុណ្ណោះ។ យើងខកចិត្តដោយសារតែយើងមិនមានកីឡាករគ្រប់គ្រាន់ក្នុងការបំពេញការប្រកួតដ៏មមាញឹកប៉ុណ្ណោះ»៕
ប្រភពព័ត៌មាន៖ Channel News Asia
