បរទេស៖ ក្រុមបាល់ទាត់ជម្រើសជាតិសិង្ហបុរី និងក្រុមជម្រើសជាសតិឥណ្ឌូនេស៊ី បានបញ្ចប់ក្នុងលទ្ធផលស្មើ ១-១ ក្នុងការប្រកួតជើងទី១នៃព្រឹត្តិការណ៍ AFF Suzuki Cup ឆ្នាំ២០២០ វគ្គពាក់កណ្តាលផ្តាច់ព្រ័ត្ររបស់ពួកគេ ដែលនាំឲ្យក្រុមទាំង២ មានក្តីសង្ឃឹមដូចគ្នា មុននឹងឈានទៅកាន់ការប្រកួតជើងទី២ នៅថ្ងៃសៅរ៍។
កីឡាករ Witan Sulaeman បានរកគ្រាប់បាល់ដ៏ល្អក្នុងការប្រួត ដើម្បីជួយឲ្យក្រុមជម្រើសជាតិឥណ្ឌូនេស៊ី មានគ្រាប់បាល់នាំមុខមុននៅនាទី ទី២៨ នៅមុនពេល Ikhsan Fandi បានរកគ្រាប់បាល់តាមស្មើវិញនៅនាទី ទី៧០។ ប៉ុន្តែ ក្រុមជម្រើសជាតិឥណ្ឌូនេស៊ី មិនទទួលបានបាល់ប៉េណាល់ទីក្នុងតង់ទី២ឡើយ ដែលអាចជាចំណុចកាត់សេចក្តីក្នុងការប្រកួតនេះ ខណៈដែលលោក Shin Tae-yong ដែលជាគ្រូបង្វឹក បាននិយាយថា ក្រុមរបស់លោកគួរតែទទួលបានបាល់ពិន័យ១១ម៉ែត្រ។
លោកបាឲ្យដឹងថា៖ «ខ្ញុំមិនបានឃើញសកម្មភាពនោះម្តងទៀតឡើយ ប៉ុន្តែ ខ្ញុំគិតថា វាស្ថិតក្នុងប្រអប់ទី បើទោះបីមិនមានវីដេអូក៏ដោយ។ យើងត្រូវតែគោរពការសម្រេចចិត្តរបស់អាជ្ញាកណ្តាល»។ លោក Tae-yong បានបន្ថែមទៀតថា៖ «យើងបានដឹងថាវានឹងក្លាយជាការប្រកួតដ៏តានតឹងមួយ នៅរាត្រីនេះ ហើយខ្ញុំគិតថា អ្នកអាចមើលឃើញថា កីឡាករអស់កម្លាំងនៅតង់ទី២ ហើយបានផ្តល់សន្ទុះដល់សិង្ហបុរីវិញ ហេតុនេះ យើងត្រូវតែផ្តោតលើការស្រោចស្រង់ឡើងវិញ និងត្រៀមសម្រាប់ការប្រកួតជើងទី២»៕
ប្រភពព័ត៌មាន៖ AFF Suzuki Cup