បរទេស៖ ក្រុមខ្លាំង២ប្រចាំតំបន់អាស៊ីអាគ្នេយ៍ នឹងត្រូវប៉ះគ្នាក្នុងវគ្គពាក់កណ្តាលផ្តាច់ព្រ័ត្រ នៅពេលដែលក្រុមបាល់ទាត់ជម្រើសជាតិវៀតណាម និងថៃ ប្រកួតគ្នានៅកីឡដ្ឋាន National នៅប្រទេសសិង្ហបុរី នៅរាត្រីនេះ។
លោក Park Hang-seo គ្រូបង្វឹកនៃក្រុមជម្រើសជាតិវៀតណាម បានសម្តែងនូវការកោតសរសើរលើគូប្រកួតរបស់ខ្លួន ខណៈដែលលោកបានលើកទឹកចិត្តឲ្យក្រុមជម្រើសជាតិថៃ ព្យាយាមបំបែកតំបន់ការពាររបស់ក្រុមខ្លួន ខណៈដែលពួកគេមិនទាន់របូតសូម្បីតែ១គ្រាប់នៅឡើយទេក្នុងយុទ្ធនាការមកទល់ពេលនេះ។ គ្រូបង្វឹកសញ្ជាតិកូរ៉េរូបនេះបានឲ្យដឹងថា៖ «ថៃ តែងតែជាបេក្ខភាពឈានមុខគេក្នុងការឈ្នះពាន Suzuki Cup។ ពួកគេជាក្រុមខ្លាំង ដោយមានកីឡាករឆ្នើមៗច្រើន ហើយបើទោះបីយើងត្រូវតែព្យាយាម និងរកគ្រាប់បាល់បញ្ចូលទីឲ្យបានពេលប្រកួតជាមួយនឹងពួកគេក៏ដោយ ប៉ុន្តែ ពួកគេក៏ត្រូវតែរកចន្លោះដើម្បីស៊ុតបាល់បញ្ចូលទីលើយើងផងដែរ»។
លោក Park បានលើកឡើងបែបនេះ ដោយសារតែគ្រូបង្វឹកនៃក្រុមជម្រើសជាតិថៃលោក Alexandre Polking មានបទពិសោធជាគ្រូបង្វឹកក្នុងកម្រិតក្លិបនៅវៀតណាម ដោយលោកបានដឹកនាំក្លិប Ho Chi Minh City FC ប៉ុន្តែ លោក Polking បានបញ្ជាក់ថា បទពិសោធនេះ មានឥទ្ធិពលតិចតួចប៉ុណ្ណោះក្នុងការប្រកួតនេះ។ ស្របពេលជាមួយគ្នានេះ លោក Polking ក៏បានបញ្ជាក់ផងដែរថា វៀតណាម គឺជាក្រុមមានប្រៀបដាច់លើក្រុមរបស់លោកក្នុងយុទ្ធនាការនេះ។
គ្រូបង្វឹកសញ្ជាតិប្រេស៊ីលរូបនេះបានឲ្យដឹងថា៖ «ខ្ញុំគិតថា ពេលវេលារបស់ខ្ញុំនៅវៀតណាម គឺជាពេលយូរណាស់មកហើយ ប៉ុន្តែ ខ្ញុំបានមើលឃើញពីការខិតខំរបស់កីឡាករ ហើយខ្ញុំស្គាល់ពីគុណភាពដែលពួកគេមាន»៕
ប្រភពព័ត៌មាន៖ AFF Suzuki Cup