បរទេស៖ ក្រុមបាល់ទាត់ជម្រើសជាតិថៃ បានបោះ១ជំហានឆ្ពោះទៅកាន់វគ្គផ្តាច់ព្រ័ត្រនៃព្រឹត្តិការណ៍ AFF Suzuki Cup ឆ្នាំ២០២០ ក្រោយពីបានកត់ត្រាជ័យជម្នះក្នុងលទ្ធផល ២-០ លើក្រុមបាល់ទាត់ជម្រើសជាតិវៀតណាម ក្នុងការប្រកួតជើងទី១ នៃវគ្គពាក់កណ្តាលផ្តាច់ព្រ័ត្ររបស់ពួកគេ នាកីឡដ្ឋាន National Stadium ប្រទេសសិង្ហបុរី។
គ្រាប់បាល់ស៊ុតបញ្ចូលទី២គ្រាប់នៅតង់ទី១ ពីកីឡាករ Chanathip Songkrasin បានជួយឲ្យក្រុមជម្រើសជាតិថៃ ស្ថិតក្នុងទីតាំងដ៏រឹងមាំក្នុងពេលសម្រាកនៅតង់ទី១ ហើយក្រុមជ្រើសជាតិវៀតណាម គួរតែចាញ់ក្នុងលទ្ធផលធំជាងនេះ ប្រសិនបើអ្នកចាំទី Tran Nguyen Manh មិនបានសង្គ្រោះបាល់ប៉េណាល់ទីពីការស៊ុតនៅនាទី ទី៨៤ពីប្រធានក្រុមរបស់ថៃរូបនេះទេនោះ។ លោក Alexandre Polking ដែលជាគ្រូបង្វឹក បានកោតសរសើរទម្រង់លេងរបស់ក្រុមលោក ប៉ុន្តែ បានប្រពមានពួកគេថា កុំឲ្យបែកអារម្មណ៍ឲ្យសោះ។
គ្រូបង្វឹកសញ្ជាតិប្រេស៊ីលរូបនេះបានឲ្យដឹងថា៖ «យើងមានប្រៀបបន្តិចបន្តួចជាមួយគ្រាប់បាល់២គ្រាប់។ វាគឺជាការបោះជំហានដ៏សំខាន់មួយ ប៉ុន្តែ វាមិនទាន់ចប់នៅឡើយទេ។ យើងដឹងថា យើងត្រូវតែកែសម្រួលចំណុចខ្លះ និងដឹងថា យើងអាចលេងល្អប្រសើរជាងនេះ ប៉ុន្តែ យើងបានដឹងថា វាពិតជាសំខាន់ណាស់ក្នុងការទទួលបានលទ្ធផលបែបនេះ»៕
ប្រភពព័ត៌មាន៖ AFF Suzuki Cup