បរទេស៖ Manchester United ត្រូវតែផ្តោតលើការអភិវឌ្ឍក្នុងនាមជាក្រុមមួយ និងមិនត្រូវផ្តោតខ្លាំងពេកទៅលើទម្រង់លេងជាឯកឡើយ ស្របពេលដែលពួកគេសម្លឹងរកការផ្លាស់ប្តូរទម្រង់លេង។ នេះបើយោងទៅតាមការបញ្ជាក់របស់គ្រូបង្វឹកបណ្តោះអាសន្នលោក Ralf Rangnick នៅមុនពេលការប្រកួតក្របខ័ណ្ឌ Premier League លើទឹកដីខ្លួនឯងជាមួយនឹងក្រុម Burnley នៅរាត្រីនេះ។
Man United ត្រឹមតែអាចដណ្តើមបានលទ្ធផលស្មើ ១-១ នៅលើទឹកដីក្រុមស្ថិតក្នុងតំបន់កាត់ចោល Newcastle United កាលពីថ្ងៃចន្ទ ខណៈដែលខ្សែការពារ Harry Maguire និងRaphael Varane បានរងនូវការរិះគន់យ៉ាងខ្លាំង។ លោក Rangnick បានប្រាប់អ្នកយកព័ត៌មានកាលពីថ្ងៃចន្ទថា៖ «Raphael មិនបានលេងប្រមាណជា៥ ឬ៦សប្តាហ៍ ហើយពិតណាស់ រូបគេបានធ្វើឲ្យមានកំហុស នៅមុនពេលគ្រាប់បាល់ទី១បានកើតឡើង ប៉ុន្តែ ក្រៅពីនោះ ខ្ញុំគិតថា រូបគេលេងបាន។
ខ្ញុំមិនបាននិយាយថា រូបគេបានបង្ហាញពីទម្រង់លេងល្អឡើយ ហើយជាមួយគ្នានេះ Harry ក៏មិនអីដែរ។ ខ្ញុំគិតថា វាមិនមែនជារឿងត្រឹមត្រូវឡើយក្នុងការនិយាយពីទម្រង់លេងរបស់បុគ្គលម្នាក់ៗ ប៉ុន្តែ យើងត្រូវតែធ្វើឲ្យបានល្អប្រសើរក្នុងនាមជាក្រុមមួយ»៕
ប្រភពព័ត៌មាន៖ Channel News Asia
