បរទេស៖ Liverpool បានស្នើសុំលីកកីឡាបាល់ទាត់អង់គ្លេសហៅកាត់ថា EFL ដើម្បីរៀបចំការប្រកួតជើងទី១នៃពាន League Cup វគ្គពាក់កណ្តាលផ្តាច់ព្រ័ត្ររបស់ពួកគេជាមួយនឹងក្រុម Arsenal ឡើងវិញ នៅថ្ងៃព្រហស្បតិ៍ ដោយសារតែមានការកើនឡើងករណីឆ្លងកូវីដ ១៩ នៅក្នុងក្លិបនេះ។ នេះបើយោងទៅតាមបញ្ជាក់របស់ក្រុមស្ថិតក្នុងក្របខ័ណ្ឌមួយនេះ កាលពីថ្ងៃអង្គារ។
Liverpool បានលុបចោលការហ្វឹកហាត់នានារបស់ក្រុមខ្លួនកាលពីថ្ងៃអង្គារ។ ក្លិបបានឲ្យដឹងក្នុងសេចក្តីថ្លែងការណ៍មួយថា៖ «ក្រុមហង្សក្រហមបានដាក់សំណើជាផ្លូវការដល់ EFL ដើម្បីស្នើសុំឲ្យកម្មវិធីប្រកួតនេះ ត្រូវរៀបចំឡើងវិញ ក្រោយពីមានករណីសង្ស័យការឆ្លងកូវីដ ១៩ ជាថ្មីម្តងទៀត ក្នុងចំណោមកីឡាករ និងបុគ្គលិក ក៏ដូចជាកត្តាប៉ះពាល់ផ្សេងទៀតក្នុងការជ្រើសរើសក្រុម ក្នុងនោះរាប់បញ្ចូលទាំងជំងឺ និងបញ្ហារបួសផងដែរ»។
លោកគ្រូបង្វឹក Juergen Klopp រួមជាមួយនឹងអ្នកចាំទី Alisson Becker ខ្សែប្រយុទ្ធ Roberto Firmino និងខ្សែការពារ Joel Matip សុទ្ធសឹងបានអវត្តមានក្នុងពេលក្រុមខ្លួនបានបញ្ចប់ក្នុងលទ្ធផលស្មើ ២-២ ជាមួយនឹងក្រុម Chelsea កាលពីចុងសប្តាហ៍មុន ដោយសារតែបន្តតេស្តឃើញលទ្ធផលវិជ្ជមាន៕
ប្រភពព័ត៌មាន៖ Channel News Asia
