បរទេស៖ Christian Eriksen បានថ្លែងអំណរគុណប្រិយមិត្តគាំទ្រ និងជាពិសេសគឺបានបើកចំហរពីក្តីសុបិន្ត ដើម្បីលេងអោយក្រុមជម្រើសជាតិដាណឺម៉ាកក្នុងព្រឹត្តិការណ៍ World Cup ឆ្នាំ ២០២២ខាងមុខ នៅក្នុងបទសម្ភាសន៍ក្នុងទូរទស្សន៍ជាលើកដំបូងរបស់ខ្លួន ក្រោយរងការវាយប្រហារដោយជំងឺ គាំងបេះដូងរួចមក។
អតីតខ្សែបម្រើកណ្តាលក្រុមមាន់ខ្នាយមាស Tottenham បានដួលសន្លប់បាត់មាត់បាត់ករក្នុងអំឡុងពេលការប្រកួតវគ្គចែកពូលព្រឹត្តិការណ៏ Euro ២០២០ ខណៈ ដាណឺម៉ាកធ្វើជាម្ចាស់ផ្ទះទទួលភ្ញៀវហ្វាំងឡង់កាលពីខែមិថុនាឆ្នាំមុន ។
ទោះយ៉ាងណាក្រោយទទួលការព្យាបាលយ៉ាង យកចិត្តទុកដាក់ពីសំណាក់ក្រុមគ្រូពេទ្យរួចមកខ្សែបម្រើវ័យ ២៩ ឆ្នាំរូបនេះ ត្រូវបានផ្តល់យោបល់ជាច្រើនថារូបគេនិងមិនទំនងអាចបន្តអាជីពបាល់ទាត់សាជាថ្មីបានទៀតឡើយ ក្រោយក្រោយត្រូវសង្គ្រោះជីវិតនៅលើទីលានប្រកួតរួចមក។ យ៉ាងណាមិញបច្ចុប្បន្ន Eriksen ត្រូវបានបន្តព្យាបាល និងបំពាក់ដោយឧបករណ៍ជំនួយដល់បេះដូង ( Implantable Cardioverter Defibrillator) ស្របពេលថ្មីៗនេះអតីតយុវជនថ្នាលក្លឹប Ajax បានត្រលប់ទៅហ្វឹកហាត់ជាមួយក្លឹបកុមារភាពរបស់ខ្លួន Odense Boldklub ជាមួយនឹងគោលដៅចង់វិលត្រលប់ទៅប្រកួតប្រជែងនៅក្នុងលីកកំពូលអឺរ៉ុបសាជាថ្មីម្តងទៀត។
Inter Milan គឺជាក្លឹបចុងក្រោយដែលបានបង្ខំចិត្តបញ្ចប់កិច្ចសន្យាជាមួយ Eriksen នៅកីឡាដ្ឋាន San Siro កាលពីខែមុន ប៉ុន្តែបញ្ហាទាំងអស់នេះមិនបានបំផ្លាញការតាំងចិត្តរបស់គាត់ ក្នុងការប្តេជ្ញាចិត្តវិលត្រលប់ទៅបន្តអាជីព និងផ្តោតលើការវិលត្រលប់ទៅជួយជម្រើសជាតិខ្លួននៅព្រឹត្តិការណ៍ World Cup 2022 ដែលនឹងត្រូវចាប់ផ្តើមតាមការគ្រោងទុកពីថ្ងៃទី២១វិច្ឆិកា ២០២២ ដល់ថ្ងៃទី១៨ធ្នូ២០២២៕
ប្រភពព័ត៍មាន៖ Metro
