បរទេស៖ ខ្សែប្រយុទ្ធ Christian Eriksen អាចនឹងវិលទៅកាន់ការប្រកួតធំៗវិញជាមួយនឹងក្រុម Manchester United ដែលកំពុងតែសម្លឹងរកការប្រើប្រាស់កីឡាករអន្តរជាតិដាណឺម៉ាករូបនេះ។ បើយោងទៅតាមសារព័ត៌មាន Sky Sports ក្លិប Man United បានទាក់ទងភ្នាក់ងារតំណាងរបស់ Eriksen ជុំវិញការចុះកុងត្រានៅកីឡដ្ឋាន Old Trafford។
លោក Dharmesh Sheth ដែលជាអ្នកយកព័ត៌មានរបស់ Sky Sports បាននិយាយថា លោក Ten Hag មានកញ្ចប់ថវិកាជាច្រើនដែលអាចប្រើប្រាស់ដើម្បីទិញចូលកីឡាករថ្មីៗបាន។ ប៉ុន្តែ Eriksen មានទេពកោសល្យដែលឆ្លើយតបគ្រប់លក្ខខណ្ឌទាំងអស់ដែលគ្រូបង្វឹកថ្មីរូបនេះ ចង់បាន។ សម្រាប់លោក Ten Hag ផ្ទាល់ ការចំណាយប្រាក់ដ៏ច្រើនបំផុតនៅលើកីឡាករល្បីៗមិនមែនជាបញ្ហាឡើយ។ ផ្ទុយវិញ អ្វីដែលសំខាន់នោះគឺថា ការទទួលបានកីឡាករដ៏ត្រឹមត្រូវ ក្នុងតម្លៃខ្លួនដែលស្រប។ បច្ចុប្បន្ន Eriksen មិនទាន់ជាប់កិច្ចសន្យាជាមួយនឹងក្លិបណាឡើយ ស្របពេលដែល Man United និង Brentford សង្ឃឹមដូចគ្នាថា នឹងអាចចុះហត្ថលេខាជាមួយនឹងរូបនេះ។
Eriksen បានបង្ហាញពីទម្រង់លេងយ៉ាងល្អ ក្នុងក្របខ័ណ្ឌ Premier League កាលពីរដូវកាលមុន ជាមួយនឹងក្លិប Brentford។ បើទោះបីមានកង្វល់នានាជុំវិញសុខភាពរបស់ខ្សែបម្រើប្រយុទ្ធអន្តរជាតិដាណឺម៉ាករូបនេះក៏ដោយ ប៉ុន្តែ Eriksen បានជួយឲ្យមិត្តរួមក្រុមរកបាន៥គ្រាប់ និងស៊ុតបាល់បញ្ចូលទី១គ្រាប់ក្នុងការបង្ហាញខ្លួន១១លើកជាមួយនឹង Brentford៕
ប្រភពព័ត៌មាន៖ Channel News Asia
