បរទេស៖ ក្លិប Manchester United បានយល់ព្រមលើការព្រមព្រៀងគ្នាមួយជាគោលដើម្បីចុះហត្ថលេខាជាមួយនឹងខ្សែបម្រើអន្តរជាតិដាណឺម៉ាក Christian Eriksen ដោយគ្មានតម្លៃខ្លួន។ នេះបើយោងទៅតាមប្រភពព័ត៌មាននានា កាលពីថ្ងៃចន្ទ។
លោក Erik ten Hag អ្នកចាត់ការទូទៅរបស់ Man United បានផ្តល់កិច្ចសន្យារយៈពេល៣ឆ្នាំដល់ Eriksen ក្រោយពីខ្សែបម្រើសញ្ជាតិដាណឺម៉ាករូបនេះ បានបង្ហាញពីទម្រង់លេងយ៉ាងល្អជាមួយនឹងក្លិប Brentford។ Eriksen វ័យ៣០ឆ្នាំ ត្រូវបានព័ត៌មានចេញផ្សាយថា បានយល់ព្រមដោយផ្ទាល់មាត់ជាមួយនឹង Man United ហើយនឹងផ្ទេរជាផ្លូវការទៅកាន់ Old Trafford ក្រោយពីការពិនិត្យសុខភាពរួចរាល់។ ការផ្ទេររបស់ Eriksen ទៅកាន់ Man United បំពេញការវិលត្រឡប់ដ៏មិននឹកស្មានដល់មួយ ក្រោយពីរូបគេបានជួបបញ្ហាគ្រោះថ្នាក់ដល់ជីវិតកាលពីឆ្នាំមុន។ រូបគេបានជួបបញ្ហាគាំងបេះដូងនៅលើទីលានប្រកួត ក្នុងទីក្រុង Copenhagen ក្នុងពេលលេងឲ្យក្រុមជម្រើសជាតិដាណឺម៉ាក ក្នុងព្រឹត្តិការណ៍ Euro ឆ្នាំ២០២០ និងត្រូវបានបង្ខំឲ្យចាកចេញក្លិប Inter Milan ក្រោយពីជាសះស្បើយ ដោយសារតែបទបញ្ជាផ្ទៃក្នុងផ្នែកសុខភាពរបស់ក្របខ័ណ្ឌ Serie A។
Eriksen ដែលបានបំពាក់ជាមួយនឹងឧបករណ៍ជំនួយបេះដូងនោះ បានបង្ហាញពីទម្រង់លេងយ៉ាងល្អ និងរឹងមាំ ពេលលេងជាកីឡាករកម្ចីនៅកីឡដ្ឋាន Brentford កាលពីរដូវកាលមុន។ រូបគេបានលេង១១ប្រកួត ក្នុងក្របខ័ណ្ឌ Premier League សម្រាប់ក្រុម Brentford ដោយបានស៊ុតបាល់បញ្ចូលទី១គ្រាប់ និងជួយឲ្យមិត្តរួមក្រុមរកបាន៤គ្រាប់ផ្សេងទៀត៕
ប្រភពព័ត៌មាន៖ Channel News Asia