ការប្រកួតលីគកំពូលកម្ពុជា ឆ្នាំ២០២២ ដែលបានប្តូរឈ្មោះមកជា Cambodian Premier League 2022 (CPL) នោះ គឺមានត្រឹម៨ក្លិបប៉ុណ្ណោះ ដែលត្រូវដាក់ឱ្យប្រកួតប្រជែងគ្នា ចំណែកក្លិបចំនួន៤ទៀត រួមទាំងក្រុមឈរនៅបាតតារាង ត្រូវដាក់ឱ្យលេង នៅលីគ២ សម្រាប់រដូវកាលថ្មី។
ការបំបែកភាពទល់ច្រក ដើម្បីអាចប្រកាសចំនួនក្រុម ដែលត្រូវដាក់ឱ្យលេងនៅលីគកំពូលកម្ពុជា ឆ្នាំ២០២២នេះ គឺបន្ទាប់ពីប្រធានសហព័ន្ធកីឡាបាល់ទាត់កម្ពុជា (FFC) លោក សៅ សុខា និងលោក Satoshi Saito នាយកប្រតិបត្តិក្រុមហ៊ុនលីគបាល់ទាត់កម្ពុជា បានបើកកិច្ចប្រជុំដោយផ្ទាល់ ជាមួយក្លិបទាំងអស់ កាលពីពេលថ្មីៗនេះ ដើម្បីធ្វើការសម្របសម្រួល និងដោះស្រាយនៅបញ្ហាជាប់គាំងមួយចំនួន ដែលកើតមានឡើង ដោយសារការជំទាស់របស់ក្លិប ដែលត្រូវបានទម្លាក់ឱ្យទៅលេងនៅលីគ២។
យ៉ាងណាក៏ដោយ បើតាមការរៀបរាប់របស់លោក Satoshi Saito បានឱ្យដឹងថា លោក សៅ សុខា ដែលជាអ្នកសម្រេចចុងក្រោយ ទៅលើការរៀបចំរបត់ថ្មី នៃលីគកំពូលកម្ពុជានេះ បានទទួលស្គាល់ថា វាពិតជាមានការលំបាក ចំពោះការកាត់ក្រុមធ្លាប់លេងនៅលីគកំពូលកម្ពុជា ឱ្យទៅលេងនៅលីគ២ នៅរដូវកាល ឆ្នាំ២០២២នេះ។
លោក លោក Satoshi Saito បានស្រង់សំដីរបស់លោក សៅ សុខា មកប្រាប់បែបនេះថា៖ «វាជាការសម្រេចចិត្តដ៏លំបាកមួយ ប៉ុន្តែគ្មានកំណែទម្រង់ណា ដែលមិនមានការឈឺចាប់នោះទេ។ ប្រធាន FFC បានបញ្ជាក់យ៉ាងច្បាស់ថា ទំនួលខុសត្រូវទាំងអស់ ស្ថិតនៅលើខ្ញុំ ហើយបានប្រាប់ក្លិបទាំងអស់ឱ្យធ្វើការរួមគ្នា ដើម្បីបង្កើតអនាគតដ៏ល្អប្រសើរជាមួយគ្នា»។
តាមរយៈការសម្រេច និងការឯកភាពគ្នា នៅក្នុងកិច្ចប្រជុំ ជាមួយក្លិបទាំងអស់ នាពេលនោះ CPL បានកំណត់យកក្រុមភ្នំពេញក្រោន ព្រះខ័នរាជស្វាយរៀង វិសាខា ណាហ្គាវើលដ៍ បឹងកេត អង្គរថាយហ្គឺរ កងយោធពខេមរភូមិន្ទ និងក្រុមគិរីវង់សុខសែនជ័យ ឱ្យបន្តលេងនៅលីគកំពូលរដូវកាលថ្មី ឆ្នាំ២០២២នេះ ប៉ុន្តែក្រុមទាំង៨នេះ ត្រូវធ្វើការប្រកួតរហូតដល់៣ជើង ដែលសរុបមានរហូតដល់១៦៨ប្រកួត ហើយការប្រកួត នឹងចាប់ផ្តើមពីថ្ងៃទី៥ ខែមីនា តទៅ។
ចំណែកក្រុមអាស៊ីអឺរ៉ុប នគរបាលជាតិ អគ្គិសនីកម្ពុជា ខេត្តព្រៃវែង និងក្រុមសូលទីឡូអង្គរ ដែលធ្លាប់លេងនៅលីគកំពូលកម្ពុជា ឆ្នាំ២០២១ ត្រូវដាក់ឱ្យមកលេងនៅលីគ២ ហើយការប្រកួតលីគ២ ឆ្នាំ២០២២នេះ ត្រូវបានកំណត់ឱ្យមានការចូលរួមត្រឹម១២ក្រុមប៉ុណ្ណោះ៕