បើទោះបីជា ក្រុមភ្នំពេញក្រោន បានទទួលបរាជ័យជាប់ៗគ្នាចំនួន២លើក បន្ថែមទៅលើការស្មើត្រឹម១លើក ប៉ុន្តែគ្រូបង្គោលលោក Oleg Starynskyi មិនបានចាត់ទុកការ រកមិនឃើញការឈ្នះសោះនេះ វាជាការបិទផ្លូវ ចំពោះភ្នំពេញក្រោន ក្នុងការការពារតំណែងជើងឯក របស់ខ្លួន នោះទេ។
គ្រូបង្វឹកជនជាតិអ៊ុយក្រែន លោក Oleg Starynskyi បានទទួលស្គាល់ថា ពិតជាបានបាត់បង់កីឡាករស្នូលសំខាន់ៗមួយចំនួន ដែលធ្វើឱ្យទម្រង់លេងរបស់ក្រុមសិង្ហក្រហម មានការប្រែប្រួល។ លោកបាននិយាយថា៖ «យើងបានបាត់បង់កីឡាករស្នូលមួយចំនួនពីប្រព័ន្ធលេងរបស់យើង ប៉ុន្តែគ្រប់កីឡាករទាំងអស់ត្រូវតែព្យាយាមឱ្យអស់ពីលទ្ធភាពនៅពេលដែលគេបង្ហាញខ្លួនលើទីលាន»។
តាមរយៈការប្រកួត៣លើកកន្លងមកនេះ ក្រុមការពារតំណែងជើងឯកភ្នំពេញក្រោន បានស្មើ ០-០ ជាមួយក្រុមកងយោធពលខេមរភូមិន្ទ (ទ័ព) តែបានចាញ់ក្រុមព្រះខ័នរាជស្វាយរៀង ៣-១ និងចាញ់ក្រុមអង្គរថាយហ្គឺរ ៤-២ ដែលនេះជាលទ្ធផលដ៏អាក្រក់ សម្រាប់ភ្នំពេញក្រោន នាការបង្ហាញខ្លួន នៅរដូវកាលនេះ។
យ៉ាងណាមិញ សម្រាប់ការប្រកួតលើកទី៤ នៅថ្ងៃសៅរ៍នេះ ក្រុមភ្នំពេញក្រោន នឹងបើកកីឡដ្ឋាន RSN របស់ខ្លួនម្តងទៀត ដើម្បីស្វាគមន៍ក្រុមអ្នកមាន វិសាខា នៅល្ងាចម៉ោង ៦:៣០ ខណៈការប្រកួតនេះ វិសាខា បានប្រកាសថា ពួកគេ បានត្រៀមខ្លួនរួចរាល់អស់ហើយ ដើម្បីការប្រកួតដ៏ធំមួយនេះ។
ខ្សែការពារដ៏រឹងមាំជនជាតិអាហ្រិកខាងត្បូង Mohammed Khan របស់ក្រុមវិសាខា ដែលរកបាន១គ្រប់ដែរ ពេល វិសាខា ឈ្នះក្រុមគិរីវង់សុខសែនជ័យ ៥-០ នោះ បានតាំងចិត្តខ្ពស់ ចំពោះការជួបក្រុមភ្នំពេញក្រោន លោកនេះ ដោយគេបាននិយាយថា៖«ខ្ញុំនឹងជួយក្រុម មិនឱ្យគេស៊ុតបញ្ចូលទីបាន ហើយនឹងខំប្រឹងឱ្យអស់ពីសមត្ថភាព ដើម្បីជួយក្រុមឱ្យទទួលបាន ៣ពិន្ទុសប្តាហ៍នេះ»។
យ៉ាងណាក៏ដោយ លោក Oleg Starynskyi បានអះអាងថា ក្រុមរបស់លោក ក៏ត្រៀមខ្លួនបានរួចរាល់ ដើម្បីការពារតំណែងជើងឯករបស់ខ្លួនដូចគ្នា។ លោកបានបញ្ជាក់ថា៖«យើងក៏ដឹងដែរថា គូប្រកួតរបស់យើង មានការលើកទឹកចិត្តខ្លាំងក្លាណាស់ នៅពេលដែលពួកគេលេងជាមួយយើង ដែលជាក្រុមការពារតំណែងជើងឯក ដូច្នេះយើងត្រូវតែត្រៀមខ្លួនរួចជាស្រេច ដើម្បីការពារតំណែងរបស់យើង»។
ដោយឡែក នៅថ្ងៃសៅរ៍នេះដែរ ក្រុមកំពុងឈរ នៅលើកំពូលតារាង ព្រះខ័នរាជស្វាយរៀង ត្រូវជួបក្រុមម្ចាស់ផ្ទះ ទ័ព នៅកីឡដ្ឋានស្តាតចាស់ នាល្ងាចម៉ោង ៦:៣០ ចំណែកក្រុមណាហ្គាវើលដ៍ ត្រូវជួបក្រុមគិរីវង់សុខសែនជ័យ នៅកីឡដ្ឋានព្រីនស៍ នាល្ងាចម៉ោង ៦:៣០ ហើយក្រុមបឹងកេត ត្រូវស្វាគមន៍ក្រុមអង្គរថាយហ្គឺរ នៅរសៀលម៉ោង ៣:៤៥ ថ្ងៃសៅរ៍នេះដូចគ្នា៕
