ការដណ្តើមបាន៣ពិន្ទុរៀងៗខ្លួន របស់ក្រុមណាហ្គាវើលដ៍ និងក្រុមកងយោធពលខេមរភូមិន្ទ (ទ័ព) លើក្រុមខ្លាំង វិសាខា និងបឹងកេត បានធ្វើឱ្យការប្រកួតលីគកំពូលកម្ពុជា ឆ្នាំ២០២២ មានការផ្លាស់ប្តូរខ្លាំង ហើយអ្វីកាន់តែប្លែកនោះ គឺក្រុមការពារតំណែងជើងឯក ភ្នំពេញក្រោន បានធ្លាក់ទៅឈរនៅបាតតារាង ដ៏មិនគួរឱ្យចង់ជឿ ចំណែកក្រុមម្ចាស់ផ្ទះអង្គរថាយហ្គឺរ បានប្រកាន់ជំហរ ពង្រឹងចំណុចខ្វះខាត ក្រោយពួកគេ មិនសូវពេញចិត្តនឹងការស្មើជាមួយក្រុមគិរីវង់សុខសែនជ័យ។
បើទោះបីជា ក្រុមវិសាខា និង បឹងកេត សុទ្ធតែបានបង្ហាញភាពខ្លាំង នៅថ្ងៃបើកឆាក ដោយបានយកឈ្នះលើក្រុមអង្គរថាយហ្គឺរ និងណាហ្គាវើលដ៍ ៣-១ ដូចគ្នា ប៉ុន្តែសម្រាប់ការប្រកួតលើកទី២ កាលពីថ្ងៃសៅរ៍ កន្លងមកនេះ គឺលទ្ធផល មានការក្រឡប់ចាក់ខ្លាំង ដែលគ្រប់គ្នាស្ទើរតែមិនចង់ជឿ ព្រោះក្រុមទាំង២នេះ បានជួបការបរាជ័យ នៅលើក្នុងទឹកដីដូចគ្នា។
តាមរយៈការប្រកួតនោះ ក្រុមម្ចាស់ផ្ទះ វិសាខា បានចាញ់ក្រុមណាហ្គាវើលដ៍ ១-០ ដែលជាការស៊ុតបាល់បញ្ចូលទីរបស់ខ្សែប្រយុទ្ធ Christian នៅនាទីទី៦៧ ចំណែកក្រុមបឹងកេត បានចាញ់ក្រុមទ័ព ១-០ ដូចគ្នា ដែលកើតចេញពីការស៊ុតបាល់បញ្ចូនទីពីចម្ងាយរបស់កីឡាករជប៉ុន Yuta Kikuchi នៅនាទីទី៥៥។
ជាមួយលទ្ធផលនេះ វាបានបង្ហាញឱ្យឃើញថា លីគកំពូលកម្ពុជា នៅរដូវកាលនេះ ពិតជាមានការផ្លាស់ប្តូរខ្លាំង ចំណែកជ័យជម្នះរបស់ក្រុមណាហ្គាវើលដ៍ ទៅលើក្រុមវិសាខា ក៏បានបង្កប់នូវរឿងរ៉ាវដ៏គួរចាប់អារម្មណ៍ផងដែរ ព្រោះជាពេលដែលអតីតកីឡាករ ឃីម បូរី បានដឹកនាំក្រុមរបស់ខ្លួន យកឈ្នះលើក្រុមរបស់លោក មាស ចាន់ណាស ដែលជាអតីតគ្រូបង្គោលរបស់ខ្លួន ពេលរួមរស់នៅក្លិបណាហ្គាវើលដ៍ ជាមួយគ្នា ផងដែរ។
យ៉ាងណាក៏ដោយ ឃីម បូរី នៅតែចាត់ទុក វិសាខា ជាក្រុមខ្លាំង ដែលពួកគេ បានយកឈ្នះដោយពិបាកបំផុត។ ឃីម បូរី បាននិយាយថា៖ «យើងដឹងហើយថា វិសាខា គឺជាក្រុមខ្លាំងមួយ ដែលសម្បូរទៅដោយកីឡាករល្អៗ អ៊ីចឹងការដណ្តើមបាន៣ពិន្ទុនេះ ពិតជាសំខាន់ណាស់ សម្រាប់យើង ក្នុងការបន្តដំណើរទៅមុខទៀត ហើយកត្តាសំខាន់ ដែលជួយឱ្យយើង ទទួលបានជ័យជម្នះលើ វិសាខា ដោយសារកីឡាករទាំងអស់ នៅលើទីលាន បានប្រឹងប្រែខ្លាំងមែនទែន ទាំងទៅលើកម្លាំង បច្ចេកទេស និងការប៉ះទង្គិចនៅលើទីលាន គឺការលេងពីម្សិលមិញ ស្វិតស្វាញ ដោយម្នាក់ៗមានឆន្ទៈចង់ឈ្នះតែម្តង»។
យ៉ាងណាមិញ ក្រុមការពារតំណែងជើងឯក ភ្នំពេញក្រោន ក៏បានជួបការបរាជ័យ សម្រាប់ការបើកកីឡដ្ឋានរបស់ខ្លួន ជាលើកដំបូង ផងដែរ ដោយពួកគេ បានចាញ់ក្រុមជើងឯករង ព្រះខ័នរាជស្វាយរៀង រហូតដល់ ៣-១។ ស្វាយរៀង ពិតជាមានការរីករាយខ្លាំង ចំពោះការដណ្តើមបាន៣ពិន្ទុដ៏សំខាន់នេះ ដើម្បីឡើងទៅឈរនៅកំពូលតារាង ជាបណ្តោះអាសន្ន ប៉ុន្តែភ្នំពេញក្រោន បានជួបស្ថានភាពកាន់តែក្រក់ ដោយបានធ្លាក់ទៅឈរនៅបាតតារាង ដោយមាន១ពិន្ទុដដែល។
ចំណែកក្រុមម្ចាស់ផ្ទះ អង្គរថាយហ្គឺរ ក៏បានត្រឹមស្មើ ៣-៣ ជាមួយក្រុមគិរីវង់សុខសែនជ័យ ផងដែរ ហើយជាមួយគ្នានេះ ខ្សែប្រយុទ្ធប្រេស៊ីល Iago ដែលជាអ្នករកបានគ្រាប់បាល់ចុងក្រោយ នៅនាទីទី៨៤ ដើម្បីជួយឱ្យក្រុមម្ចាស់ផ្ទះ ស្មើក្រុមគិរីវង់ នោះ ហាក់មិនសូវពេញចិត្តនឹងលទ្ធផលនេះប៉ុន្មានឡើយ ដោយគេបានជំរុញឱ្យ ក្រុមអង្គរថាយហ្គឺរ ត្រូវខំ
កីឡាករេពាក់លេខ១៥ Iago បាននិយាយក្រោយការប្រកួតថា៖ «វាជាការប្រកួតដ៏ល្អមួយ។ យើងបានបង្កើតឱកាសជាច្រើន ហើយយើងគួរតែអាចទាត់បញ្ចូលទីបានច្រើនជាងនេះ។ យើងត្រូវការកែប្រែត្រង់ចំណុចនេះ និងចំណុចតូចៗផ្សេងទៀត។ ក្រុមរបស់យើងកំពុងវិវឌ្ឍ ហើយខ្ញុំអាចមានអារម្មណ៍ថា គ្រប់គ្នា គឺកំពុងតែប្រសើរឡើង អ៊ីចឹងយើង ត្រូវតែអត់ធ្មត់ ព្រោះយើងអាចធ្វើបានច្រើនជាងនេះ។ ឥឡូវយើង នឹងបំភ្លេចពីលទ្ធផលប្រកួតចាស់ និងកែប្រែសម្រាប់ប្រកួតបន្ទាប់»៕