ប្រយុទ្ធចំណូលថ្មីមកពីជប៉ុន Takumu Nishihara បង្កើតបានកំណត់ត្រាថ្មី ក្នុងនាមជារកបានគ្រាប់បាល់ច្រើនជាងគេ នៅក្នុងការប្រកួតលីគកំពូលកម្ពុជា ឆ្នាំ២០២២នេះ ចំណែកក្រុមព្រះខ័នរាជស្វាយរៀង បានក្លាយជាក្រុមតែមួយគត់ ដែលមិនទាន់ស្គាល់ការចាញ់សោះ សម្រាប់ការប្រកួតជើងទី១នេះ។
សម្រាប់ការប្រកួតចុងក្រោយ ក្នុងជើងទី១នេះ កាលពីថ្ងៃសៅរ៍ ក្រុមព្រះខ័នរាជស្វាយរៀង បានយកឈ្នះក្រុមម្ចាស់ផ្ទះវិសាខា ២-១ ហើយលទ្ធផលនេះ បានបង្ហាញឱ្យឃើញថា ព្រះខ័នរាជស្វាយរៀង បានក្លាយជាក្រុមគ្មានគូប្រៀប សម្រាប់ការប្រកួតជើងទី១ នេះ ដោយពួកគេ បានបញ្ចប់ការប្រកួតទាំង៧លើក ដោយមិនស្គាល់ការចាញ់សោះ។
ជាមួយគ្នានេះ ក្រុមស្វាយរៀង ក៏កាន់តែមានភាពរឹងមាំ ក្នុងការឈរនៅកំពូលតារាង ផងដែរ ព្រោះដៃគូប្រកួតរបស់ពួកគេ បឹងកេត និង ណាហ្គាវើលដ៍ ដែលមានពិន្ទុប្រដេញពីក្រោយ ក្នុងនាមជាក្រុមឈរនៅលេខ២ និងលេខ៣នោះ សុទ្ធតែទទួលបានលទ្ធផល មិនគាប់ប្រសើរ សម្រាប់ការប្រកួតបញ្ចប់ជើងទី១នេះ។
តាមរយៈការប្រកួត ក្នុងថ្ងៃសៅរ៍ជាមួយគ្នានោះ ក្រុមបឹងកេត មិនអាចរក្សាការមានប្រៀប រហូតដល់ចប់ម៉ោងនោះទេ ដោយពួកគេ ត្រូវបានក្រុមភ្នំពេញក្រោន វាយបកតាមស្មើ ២-២ ចំណែក ណាហ្គាវើលដ៍ ដែលបានជួបភាពរីករាយច្រើនជាងការខកចិត្តនោះ បានទៅចាញ់ក្រុមម្ចាស់ផ្ទះ អង្គរថាយហ្គឺរ ៤-៣ ហើយតាមលទ្ធផលនេះ ក្រុមស្វាយរៀង ដែលកំពុងឈរនៅលេខ១ គឺមានពិន្ទុដាច់ឆ្ងាយពីក្រុមលេខ២ រហូតដល់៦ពិន្ទុ។
ជាមួយគ្នានេះ កីឡាករពាក់លេខ១០ មកពីជប៉ុន Takumu Nishihara របស់ក្រុមកងយោធពលខេមរភូមិន្ទ (ទ័ព) បានបង្កើតកំណត់ត្រថ្មី បានមុនគេ ក្នុងនាមជាកីឡាកររកបាន៥គ្រាប់តែម្នាក់ឯង ក្នុង១ប្រកួត ហើយការស៊ុតទម្លុះសំណាញ់ទី មិនបានបណ្តាក់ជើងនេះ បានកើតមានឡើង នោពេលក្រុមទ័ព បានបានយកឈ្នះក្រុមគិរីវង់សុខសែនជ័យ ៥-១ នៅកីឡដ្ឋានស្តាតចាស់ កាលពីថ្ងៃសៅរ៍ ហើយការរកបាន៥គ្រាប់បន្ថែមនេះ ក៏បានជួយឱ្យ Takumu ឡើងទៅឈរនៅលេខ២ ក្នុងនាមជាអ្នករកបានគ្រាប់បាល់ច្រើនជាងគេ ជាបណ្តោះអាសន្ន (៨គ្រាប់) បន្ទាប់ពីខ្សែប្រយុទ្ធ Marcus របស់ក្រុមស្វាយរៀង ដែលរកបាន១០គ្រាប់៕
