គ្រូបង្វឹកថ្មីរបស់ក្រុមណាហ្គាវើលដ៍ លោក ឃីម បូរី មានការជឿជាក់ថា ខ្សែប្រយុទ្ធប្រេស៊ីល Christian ដែលជាអ្នកជួយឱ្យក្រុមដណ្តើមបាន៣ពិន្ទុ ជាលើកដំបូង ពីក្រុមវិសាខា នោះ នឹងបង្ហាញទម្រង់លេងកាន់តែល្អ សម្រាប់ការជួបក្រុមកងយោធពលខេមរភូមិន្ទ (ទ័ព) នៅកីឡដ្ឋានស្តាតចាស់ នាល្ងាចម៉ោង ៦:៣០ ថ្ងៃសៅរ៍នេះ។
ឃីម បូរី បាននិយាយថា៖ «ចំពោះកីឡាករ Christian ពេលប្រកួតជាមួយក្រុមវិសាខា គាត់បានបង្ហាញទម្រង់លេងល្អមែនទែន សម្រាប់ជួបក្រុម ទាំងការលេងជាក្រុម និងលេងជាលក្ខណៈបុគ្គលខ្លួនគាត់ គឺមានន័យថា ការសហការគ្នា នៅលើទីលាន ទាំងបច្ចេកទេស និងកលល្បិច គាត់បានយល់ច្រើន ចំណែកការជួបក្រុមទ័ព នៅសប្តាហ៍ទី៣នេះ ខ្ញុំជឿថា គាត់នឹងធ្វើបានកាន់តែល្អ ជាងការប្រកួតជាមួយវិសាខា ទៅទៀត»។
គួរបញ្ជាក់ថា សម្រាប់ការប្រកួតលើកទី២ ជាមួយក្រុមខ្លាំង វិសាខា កាលពីថ្ងៃសៅរ៍ សប្តាហ៍មុន ខ្សែប្រយុទ្ធចំណូលថ្មី Christian ជាអ្នករកបានគ្រាប់បាល់ជ័យជម្នះ ១-០ នៅនាទីទី៦៧ ហើយការដណ្តើមបាន៣ពិន្ទុ ពីក្រុមវិសាខា ក្រោយចាញ់ក្រុមបឹងកេត ៣-១ នេះ បាននឹងកំពុងធ្វើឱ្យណាហ្គាវើលដ៍ មានកម្លាំងចិត្តកាន់តែខ្លាំង ចំពោះការជួបក្រុមទ័ព លើកនេះ ប៉ុន្តែ ឃីម បូរី មិនហ៊ានមើលរំលងពីភាពខ្លាំងរបស់ក្រុមទ័ព នោះទេ។
គ្រូបង្វឹកក្រុមណាហ្គាវើលដ៍ លោក ឃីម បូរី បានបញ្ជាក់ថា៖ «បន្ទាប់ពីយើងបានយកឈ្នះក្រុមវិសាខា មក កីឡាករទាំងអស់ មានស្មារតី កាន់តែពុះកញ្ជ្រោល ទាំងលើការហ្វឹកហាត់ ដោយពួកគាត់ រៀបចំខ្លួនបានល្អមែនទែន សម្រាប់ការជួបក្រុមទ័ព លើកនេះ។ តែទោះបីជាយ៉ាងណា ក្រុមទ័ព នៅរដូវកាលនេះ គឺជាក្រុមខ្លាំងមួយ ដោយពួកគាត់ បានស្មើ ភ្នំពេញក្រោន និងបានឈ្នះ បឹងកេត ដោយមិនរបូតគ្រាប់បាល់ទៀត អ៊ីចឹងគាត់ជាក្រុមខ្លាំងមួយ ដែលយើងមិនអាចមើលរំលង បាននោះទេ»។
យ៉ាងណាមិញ ក្រុមទ័ព ក្រោមការដឹកនាំរបស់អ្នកចាត់ការក្រុម លោក ទេព ឡុងចរនា ក៏ត្រៀមខ្លួនបានល្អផងដែរ ហើយការយកឈ្នះក្រុមបឹងកេត ១-០ បន្ថែមទៅលើការស្មើ ០-០ ជាមួយក្រុមភ្នំពេញក្រោន កាលពីថ្ងៃបើកឆាកនោះ បានធ្វើឱ្យពួកគេ មានកម្លាំងចិត្តខ្លាំងដូចគ្នា ចំពោះការដណ្តើម៣ពិន្ទុជាមួយក្រុមណាហ្គាវើលដ៍ នៅថ្ងៃសៅរ៍នេះ ដើម្បីអាចបន្តឈរនៅលេខ២ បន្ទាប់ពីក្រុមព្រះខ័នរាជស្វាយរៀង ដែលត្រូវជួបបឹងកេត នៅល្ងាចម៉ោង ៦:៣០ ថ្ងៃសៅរ៍នេះដែរ ចំណែកក្រុមភ្នំពេញក្រោន ត្រូវជួបក្រុមម្ចាស់ផ្ទះ អង្គរថាយហ្គឺរ នៅរសៀលម៉ោង ៣:៤៥ ហើយវិសាខា ត្រូវស្វាគមន៍ក្រុមគិរីវង់សុខសែនជ័យ នៅកីឡដ្ឋានព្រីនស៍របស់ខ្លួន នាល្ងាចម៉ោង ៦:៣០ ថ្ងៃសៅរ៍នេះដែរ៕