បរទេស៖ អតីតតារាឆ្នើម២នាក់របស់ក្លិប Southampton គឺ Sadio Mane និង Sofiane Boufal សុទ្ធសឹងរកបានគ្រាប់បាល់ដូចគ្នាក្នុងយុទ្ធនាការ Africa Cup of Nations ដើម្បីជួយឲ្យក្រុមជម្រើសជាតិសេណេហ្គាល់ និងម៉ារ៉ុក ឈ្នះដូចគ្នានៅថ្ងៃប្រកួតបើកឆាកក្នុងពូលរបស់ពួកគេ ក្នុងប្រទេសកាមេរូន កាលពីថ្ងៃចន្ទ។
Mane ដែលបានផ្ទេរទៅកាន់ក្លិប Liverpool ក្នុងឆ្នាំ២០១៦ ក្រោយពីបានចំណាយពេលអស់២ឆ្នាំជាមួយនឹង Southampton បានស៊ុតបាល់ប៉េណាល់ទី នៅនាទីបន្ថែម ដើម្បីជួយឲ្យក្រុមខ្លួនយកឈ្នះលើក្រុមជម្រើសជាតិហ្ស៊ីបាវ៉េ ក្នុងលទ្ធផល ១-០ ក្នុងការប្រកួតពូល B នៅទីក្រុង Bafoussam។ ក្នុងរយៈពេលប៉ុន្មានម៉ោងក្រោយមក ដល់វេនកីឡាករ Boufal ដែលបច្ចុប្បន្នលេងឲ្យក្រុម Angers ក្នុងក្របខ័ណ្ឌបារាំង Ligue 1 ក្រោយពីចំណាយពេលអស់៤ឆ្នាំនៅក្លិប Southampton ក្នុងការស៊ុតបាល់បញ្ចូលទី ដើម្បីជួយឲ្យក្រុមម៉ារ៉ុក យកឈ្នះក្នុងលទ្ធផល ១-០ លើក្រុមជម្រើសជាតិហ្គាណា ក្នុងការប្រកួតពូល C ក្នុងទីក្រុង Yaounde។
ក្នុងការប្រកួតពូល B ១គូទៀត ក្រុមជម្រើសជាតិហ្គីណេ បានយកឈ្នះលើក្រុមម៉ាឡាវី ១-០ តាមរយៈគ្រាប់បាល់របស់កីឡាករ Issiaga Sylla នៅនាទី ទី៣៥ ក្នុងការប្រកួតក្រោមកម្តៅថ្ងៃ៣០អង្សាសេ ក្នុងទីក្រុង Bafoussam។ លទ្ធផលនេះ បានរក្សាការដណ្តើមបានជ័យជម្នះក្នុងលទ្ធផល ១-០ ក្នុងយុទ្ធនាការមួយដែលបានចាប់ផ្តើមកាលពីថ្ងៃអាទិត្យ ក្រោយពីត្រូវបានពន្យារពេលអស់រយៈពេល១ឆ្នាំ ដោយសារតែការផ្ទុះការឆ្លងកូវីដ ១៩៕
ប្រភពព័ត៌មាន៖ AFP