បរទេស៖ លោក Carlos Queiroz គ្រូបង្វឹកនៃក្រុមបាល់ទាត់ជម្រើសជាតិអេហ្ស៊ីប បាននិយាយថា ក្រុមរបស់លោក «នឹងការពារជាមួយនឹងកីឡាករ១៦នាក់» នៅពេលដែលពួកគេការពារគ្រាប់បាល់នាំមុខ ១-០ លើក្រុមបាល់ទាត់ជម្រើសជាតិសេណេហ្គាល់ នៅរាត្រីនេះ ក្នុងការប្រកួតជើងទី២ក្នុង World Cup វគ្គ Playoff ប្រចាំទ្វីបអាហ្វ្រិក។
អតីតអ្នកចាត់ការទូទៅរបស់ក្លិប Real Madrid និងជំនួសការគ្រូបង្វឹករបស់ក្លិប Manchester United រូបនេះបានឲ្យដឹងថា៖ «អ្វីដែលខ្ញុំចង់មានន័យជាមួយនឹងកីឡាករ១៦នាក់ គឺថា កីឡាករម្នាក់ៗត្រូវតែប្រឹងឲ្យជាកីឡាករ២នាក់ មិនមែនជាកីឡាករតែម្នាក់ឡើយ»។ លោកបានបន្ថែមទៀតថា៖ «យើងពិតជាសក្តិសមក្នុងការដណ្តើមបានជ័យជម្នះក្នុងការប្រកួតជើងទី១ ពេលប្រកួតជាមួយនឹងក្រុមខ្លាំងបំផុតក្នុងទ្វីបអាហ្វ្រិក ហើយបច្ចុប្បន្ន យើងនឹងធ្វើដំណើរទៅកាន់ប្រទេសសេណេហ្គាល់ ដើម្បីប្រយុទ្ធគ្រប់ផ្នែកទាំងអស់ ពិសេសពេលបាត់បាល់។ រាល់កីឡាករអេហ្ស៊ីបទាំងអស់ ត្រូវតែប្រឹងឲ្យបានទ្វេដង»។
ការប្រកួតវគ្គ Playoff ដែលនឹងតម្រូវឲ្យតារាឆ្នើមរបស់ក្លិប Liverpool គឺ Mohamed Salah របស់ក្រុមជម្រើសជាតិអេហ្ស៊ីប និង Sadio Mane របស់សេណេហ្គាល់ ប៉ះគ្នានោះ គឺជាការជួបគ្នាម្តងទៀត បន្ទាប់ពីការប្រកួតគ្នាក្នុង Africa Cup of Nations វគ្គផ្តាច់ព្រ័ត្រ ដោយក្រុមសេណេហ្គាល់ បានយកឈ្នះដោយការស៊ុតបាល់ប៉េណាល់ទី បន្ទាប់ពីបញ្ចប់ក្នុងលទ្ធផលស្មើ ០-០៕
ប្រភពព័ត៌មាន៖ Channel News Asia
