បរទេស៖ Edinson Cavani របស់ក្រុមបិសាចក្រហម Man United បានច្រានចោលការចាកចេញពីក្លឹបនៅក្នុងទីផ្សារដោះដូរកីឡាករដែលកំពុងបើកដំណើរការបាន១០ថ្ងៃមកហើយនៅខែមករានេះ។មានពាក្យចចាមអារ៉ាមលើកឡើងចំពោះការចាកចេញពី ទឹកដី Old Trafford របស់ ខ្សែប្រយុទ្ធដ៏មានបទពិសោធន៍រូបនេះទៅកាន់ក្លឹប Barcelona ប៉ុន្តែត្រូវបានសាម៉ីខ្លួនបដិសេធ។
កីឡាករអន្តរជាតិអ៊ុយរូហ្គាយបង្ហាញខ្លួនបាន៨លើកនៅក្របខណ្ឌ Premier League រដូវកាលនេះ ខណៈអ្នកចាត់ការបណ្តោះអាសន្នលោក Ralf Rangnick បានបញ្ជាក់ថា Cavani នឹងបន្តលេងអោយក្លឹបយ៉ាងហោចណាស់បញ្ចប់រដូវកាលនេះ ។
គ្រូបង្វឹកអាឡឺម៉ង់ត្រូវបានដកស្រង់សម្តីយ៉ាងដូច្នេះថាៈខ្ញុំប្រាប់ពីគោលបំណងដែលចង់ឲ្យគាត់បន្តនៅ ហើយខ្ញុំក៏ជជែកជាមួយគាត់។ យើងបាននិយាយគ្នាជិតកន្លះម៉ោង ហើយគាត់បានប្រាប់ខ្ញុំថា គាត់នឹងស្នាក់នៅ ហើយចង់បន្តរហូតដល់ចប់រដូវកាលនេះ។ Man Utd នឹងត្រូវធ្វើការប្រកួតពានរង្វាន់ដ៏ចំណាស់របស់អង់គ្លេសគឺ FA Cup នៅរាត្រីថ្ងៃចន្ទក្នុងជុំទីបីជាមួយ Aston Villa៕
ប្រភពព័ត៍មាន៖ Sportsmole