បរទេស៖ Kelechi Iheanacho បានទាញយកការចាប់អារម្មណ៍នានា ពីតារាឆ្នើមក្នុងក្របខ័ណ្ឌ Premier League គឺ Mohamed Salah និង Riyad Mahrez កាលពីថ្ងៃអង្គារ ខណៈដែលក្រុមបាល់ទាត់ជម្រើសជាតិនីហ្សេរីយ៉ា បានទទួលជ័យជម្នះនៅថ្ងៃបើកឆាក ក្នុងយុទ្ធនាការ Africa Cup of Nations របស់ពួកគេ ហើយក្រុមម្ចាស់ការពារតំណែងជើងឯក អាល់ហ្សេរី បានបញ្ចប់ត្រឹមលទ្ធផលស្មើ។
ខ្សែប្រយុទ្ធរបស់ក្លិប Leicester City រូបនេះ បានរកគ្រាប់បាល់កាត់សេចក្តីតែ១គ្រាប់ នៅនាទី ទី៣០ ខណៈដែលនីហ្សេរីយ៉ា បានផ្តួលក្រុមជម្រើសជាតិអេហ្ស៊ីប ក្នុងលទ្ធផល ១-០ ក្នុងការប្រកួតពូល D ក្នុងទីក្រុង Garoua។ គ្រាប់បាល់ឈ្នះ និងការបង្ហាញពីទម្រង់លេងយ៉ាងល្អរបស់គេ បានជួយឲ្យ Iheanacho ជាប់ជាកីឡាករឆ្នើមប្រចាំការប្រកួត នៅថ្ងៃដែល ខ្សែប្រយុទ្ធ Salah របស់ក្លិប Liverpool និងខ្សែបម្រើស្លាប Mahrez របស់ក្លិប Manchester City មិនអាចបង្កើតការភ្ញាក់ផ្អើលបាន។
លោក Augustine Eguavoen គ្រូបង្វឹកបណ្តោះអាសន្នរបស់ក្រុមជម្រើសជាតិនីហ្សេរីយ៉ា បានឲ្យដឹងថា៖ «យើងមានចំណុច៣នៅក្នុងចិត្ត ការទទួលជ័យជម្នះ ការដណ្តើមការគ្រប់គ្រងបាល់ឲ្យបានច្រើន និងកាត់ផ្តាច់ការបញ្ជូនបាល់ទៅកាន់ Salah។ គ្រប់ការប្រកួតទាំង នឹងត្រូវចាត់ទុកថា ដូចជាវគ្គផ្តាច់ព្រ័ត្រអ៊ីចឹង ពីព្រោះក្រុមនីមួយៗ នៅប្រទេសកាមេរូននេះ មិនអាចមើលស្រាលបានឡើយ មិនថា ក្រុមប្រទេសណាក៏ដោយ»៕
ប្រភពព័ត៌មាន៖ Channel News Asia