បរទេស៖ លោក Thomas Tuchel បាននិយាយថា Chelsea បានឈានទៅវគ្គផ្តាច់ព្រ័ត្រនៃពាន League Cup បើទោះបី «បានប្រឡែងលេងនឹងភ្លើង» ខណៈដែលគ្រាប់បាល់ស៊ុតបញ្ចូលទីរបស់ខ្សែការពារ Antonio Rudiger និងការសម្រេចចិត្ត៣លើកពីវីដេអូជំនួយការអាជ្ញាកណ្តាល (VAR) បានជួយឲ្យក្រុមតោខៀវមួយនេះ ដណ្តើមបានជ័យជម្នះក្នុងលទ្ធផល ១-០ នៅលើទឹកដីក្រុម Tottenham កាលពីថ្ងៃពុធ។
ការតែតបាល់បញ្ចូលទីនៅតង់ទី១របស់ Rudiger បានជួយឲ្យក្រុម Chelsea បន្ថែមសម្ពាធមួយកម្រិតទៀតលើក្រុមម្ចាស់ផ្ទះ ក្រោយពីពួកគេដណ្តើមបានជ័យជម្នះក្នុងលទ្ធផល ២-០ ក្នុងការប្រកួតជើងទី២ នៃវគ្គពាក់កណ្តាលផ្តាច់ព្រ័ត្រ កាលពីសប្តាហ៍មុន។
ក្រុមរបស់លោក Tuchel ក៏ជួបសំណាងល្អតាមរយៈការកាត់សេចក្តីរបស់មន្ត្រីអាជ្ញាកណ្តាល VAR លោក Mike Dean ផងដែរ ស្របពេលដែលក្រុម Tottenham ត្រូវបានផ្តល់បាល់ប៉េណាល់ទី២លើក ដោយលោកអាជ្ញាកណ្តាល Andre Marriner នៅមុនពេលការត្រួតពិនិត្យវីដេអូឡើង បានលុបចោលការកាត់សេចក្តីនោះទាំង២លើក ស្របពេលដែលការស៊ុតបាល់បញ្ចូលទីរបស់ Harry Kane ក៏ត្រូវបានកាត់សេចក្តីថា ជាបាល់ Offside ផងដែរ។
Chelsea ដែលឈ្នះទាំង២ជើងក្នុងលទ្ធផល ៣-០ នឹងត្រូវប៉ះជាមួយនឹងក្រុម Liverpool ឬ Arsenal ក្នុងវគ្គផ្តាច់ព្រ័ត្រនាកីឡដ្ឋាន Wembley នៅថ្ងៃទី២៧ ខែកុម្ភៈ។
Liverpool នឹងធ្វើជាម្ចាស់ផ្ទះទទួលក្រុមកាំងភ្លើងធំ ក្នុងការប្រកួតជើងទី១ នៃវគ្គពាក់កណ្តាលផ្តាច់ព្រ័ត្រ នៅរាត្រីនេះ។ លោក Tuchel បានឲ្យដឹងថា៖ «យើងបានចាប់ផ្តើមយ៉ាងល្អ។ យើងមានឱកាសល្អៗជាច្រើន និងបានគ្រប់គ្រងការប្រកួត ប៉ុន្តែ ខ្ញុំមានអារម្មណ៍ថា យើងបានប្រឡែងលេងជាមួយនឹងភ្លើង»៕
ប្រភពព័ត៌មាន៖ Channel News Asia
