បរទេស៖ មានទិដ្ឋភាពដ៏ជ្រួលច្របល់ បានកើតឡើងក្នុងការប្រកួត Africa Cup of Nations កាលពីថ្ងៃពុធ ខណៈដែលក្រុមបាល់ទាត់ជម្រើសជាតិម៉ាលី បានផ្តួលក្រុមជម្រើសជាតិទុយនីស៊ី ក្នុងការប្រកួតមួយ ដែលត្រូវបានរំខាន ដោយការកាត់សេចក្តីយ៉ាងចម្រូងចម្រាស់ នៅពេលដែលលោកអាជ្ញាកណ្តាលបានផ្តុំកញ្ចែបញ្ចប់ការប្រកួត នៅមុនពេលរយៈពេល៩០នាទី។
ហេតុករណ៍នេះ បានក្លាយជាពពកខ្មៅទាំងស្រុងចំពោះការដណ្តើមបានជ័យជម្នះ ១-០ របស់ម៉ាលី លើក្រុមជម្រើសជាតិទុយនីស៊ី ក្នុងទីក្រុង Limbe ស្របពេលដែលក្រុមជម្រើសជាតិហ្គំប៊ី និងកូតឌីវ័រ ក៏ដណ្តើមបានជ័យជម្នះ ១-០ ដូចគ្នាផងដែរ ខណៈដែលការប្រកួតជុំទី១ នៃវគ្គចែកពូល ក្នុងយុទ្ធនាការនេះ បានបញ្ចប់ទាំងស្រុង។ អាជ្ញាកណ្តាលសញ្ជាតិហ្សំប៊ី លោក Janny Sikazwe បានផ្លុំកញ្ចែបង្ហាញពីសញ្ញាបញ្ចប់ការប្រកួត ស្របពេលនាឡិកា នៅបង្ហាញនាទី ទី៨៩ និង៤២វិនាទីនៅឡើយ ដែលនាំឲ្យក្រុមទុយនីស៊ីខឹងសម្បារយ៉ាងខ្លាំង ដោយសារតែពួកគេកំពុងតែព្យាយមារកគ្រាប់បាល់តាមស្មើពេលប្រកួតជាមួយនឹងគូប្រកួតដែលនៅសល់សមាជិកតែ១០នាក់។
ដោយសារតែការភាន់ច្រឡំនេះ គ្រូបង្វឹករបស់ក្រុមម៉ាលី លោក Mohamed Magassouba បានទៅផ្តល់បទសម្ភាសបន្ទាប់ពីការប្រកួតរបស់លោក ប៉ុន្តែ មន្ត្រីម្នាក់ បានចូលក្នុងបន្ទប់សន្និសីទសារព័ត៌មាននោះ ដើម្បីបញ្ជាក់ថា ការប្រកួតនឹងចាប់ផ្តើមឡើងវិញ ដោយសារតែនៅសល់រយៈពេល៣នាទីទៀត។ ក្រុមម៉ាលី បានវិលទៅកាន់ទីលានប្រកួតវិញ ប៉ុន្តែ ក្រុមទុយនីស៊ី មិនបានបង្ហាញខ្លួនឡើយ ហេតុនេះ អាជ្ញាកណ្តាលក៏សម្រេចបញ្ចប់ការប្រកួតតែម្តង៕
ប្រភពព័ត៌មាន៖ Channel News Asia
