បរទេស៖ ខ្សែប្រយុទ្ធ Cristiano Ronaldo បាននិយាយថា ការបញ្ចប់ខុសពីចំណាត់ថ្នាក់កំពូលទាំង៣ ក្នុងក្របខ័ណ្ឌ Premier League នឹងក្លាយជារឿងមិនអាចទទួលយកបានឡើយសម្រាប់ក្រុម Manchester United ស្របពេលដែលលោក Ralf Rangnick កំពុងតែព្យាយាមស្វែងរកដំណោះស្រាយក្នុងក្រុមដែលធ្លាក់ទម្រង់លេងរបស់លោក។
គ្រូបង្វឹកសញ្ជាតិអាល្លឺម៉ង់រូបនេះ បានធ្វើឲ្យក្រុមរបស់លោកមានលំនឹង ចាប់តាំងពីចូលកាន់តំណែងជំនួសលោក Ole Gunnar Solskjaer ប៉ុន្តែ ក្រុម Man United នៅតែស្ថិតក្នុងចំណាត់ថ្នាក់លេខ៧ លើតារាង ដោយដេញតាមពីក្រោយក្រុមកំពុងនាំមុខ Manchester City រហូតដល់២២ពិន្ទុ។ កីឡាករឆ្នើមប្រចាំឆ្នាំរបស់ពិភពលោក៥សម័យកាលរូបនេះ បានអំពាវនាវឲ្យមានការផ្លាស់ប្តូរផ្នត់គំនិត ក្នុងក្រុមរបស់គេ ដើម្បីសោះស្រាយទម្រង់លេងដ៏អន់របស់ក្រុម Man United ខណៈដែលការធ្លាក់ចុះទម្រង់លេង បាននាំឲ្យពួកគេចាញ់ក្រោមស្នាដៃក្រុម Wolves ក្នុងលទ្ធផល ១-០ ក្នុងការប្រកួតក្របខ័ណ្ឌលីកចុងក្រោយរបស់ពួកគេ។
Ronaldo បានប្រាប់ទូរទស្សន៍ Sky Sports ថា៖ «ក្រុម Manchester United គួរតែឈ្នះពានលីក ឬស្ថិតក្នុងចំណាត់ថ្នាក់លេខ២ ឬលេខ៣។ ខ្ញុំមិនមើលឃើញចំណាត់ថ្នាក់លេខផ្សេងសម្រាប់ Manchester United»។ ខ្សែប្រយុទ្ធរូបនេះបានបន្ថែមទៀតថា៖ «ក្នុងចិត្តរបស់ខ្ញុំ មិនទទួលស្គាល់ថា ស្មារតីរបស់យើងមិនស្ថិតក្នុងចំណាត់ថ្នាក់កំពូលទាំង៣លើតារាងក្របខ័ណ្ឌ Premier League»៕
ប្រភពព័ត៌មាន៖ Channel News Asia