បរទេស៖ ក្រុមបាល់ទាត់ជម្រើសជាតិហ្គីណេអេក្វាទ័រ បានធ្វើឲ្យក្រុមជម្រើសជាតិអាល់ហ្សេរី រងបរាជ័យជាលើកដំបូងក្នុងចំណោមការប្រកួត៣៦លើក កាលពីថ្ងៃអាទិត្យ ដើម្បីធ្វើឲ្យក្រុមម្ចាស់ការពារជើងឯកមួយនេះ ស្ថិតក្នុងគ្រោះថ្នាក់នៃការធ្លាក់ចេញត្រឹមវគ្គចែកពូល ក្នុងព្រឹត្តិការណ៍ Africa Cup of Nations ក្រោយពីការប្រព្រឹត្តកំហុសរបស់អ្នកចាំទី បានធ្វើឲ្យកូតឌីវ័រ បាត់បង់ជ័យជម្នះ។
Esteban Obiang ដែលជាកីឡាករម្នាក់ក្នុងចំណោមកីឡាករជាច្រើននាក់របស់ហ្គីណេអាក្វាទ័រ ដែលបានកើតនៅអេស្ប៉ាញ បានរកគ្រាប់បាល់បញ្ចូលទីនៅនាទី ទី៧០ ដើម្បីជួយឲ្យក្រុមរបស់ខ្លួនដណ្តើមបានជ័យជម្នះ ១-០ ក្នុងទីក្រុង Douala ស្របពេលដែលអាល់ហ្សេរីបានរងបរាជ័យជាលើកដំបូង បើគិតចាប់តាំងពីខែតុលា ឆ្នាំ២០១៨។ ការមិនស្គាល់ចាញ់សោះនេះ បានបញ្ចប់ត្រឹម៣៥ប្រកួត ដោយដេញតាមពីក្រោយកំណត់ត្រានៃការមិនស្គាល់ចាញ់របស់ក្រុមជម្រើសជាតិអ៊ីតាលី ចំនួន២ប្រកួត ហើយអាល់ហ្សេរី ពេលនេះ ត្រូវតែផ្តួលក្រុមជម្រើសជាតិកូតឌីវ័រ ក្នុងការប្រកួតចុងក្រោយក្នុងពូល E របស់ខ្លួន នៅថ្ងៃព្រហស្បតិ៍ ប្រសិនបើពួកគេចង់ឈានទៅវគ្គ១៦ក្រុមចុងក្រោយ។
លោក Djamel Belmadi គ្រូបង្វឹកនៃក្រុមជម្រើសជាតិអាល់ហ្សេរី បានឲ្យដឹងថា៖ «គ្រប់គ្នាកំពុងតែនិយាយពីកំណត់ត្រានៃការមិនស្គាល់ចាញ់ផងដែរ ប៉ុន្តែ ពេលនេះ យើងត្រូវតែផ្តោតលើអ្វីផ្សេងៗ ពោលគឺដណ្តើមសិទ្ធិទៅវគ្គបន្ត»៕
ប្រភពព័ត៌មាន៖ Channel News Asia