បរទេស៖ Man Utd នឹងត្រូវប្រឈមការប្រកួតប្រជែងប្រសិនបើពួកគេសម្រេចចិត្តលើគោលដៅអាទិភាពនាំយក Mauricio Pochettino មកកាន់ទឹកដី Old Trafford នៅមុនព្រឹត្តការណ៏ប្រកួតរដូវកាល២០២២-២០២៣ចាប់ផ្តើម។ក្រុមបិសាចក្រហមបានកំណត់អត្តសញ្ញាណគ្រូបង្វឹកដែលកំពុងដឹកនាំ Paris Saint-Germain ដើម្បីមកជំនួសតំណែងលោក Ralf Rangnick នៅចុងបញ្ចប់នៃរដូវកាលនេះ។
ទោះបីជាយ៉ាងណា យោងគេហទំព័រ The Telegraph បានចុះផ្សាយថាក្លឹបមួយដែលកំពុងលេងនៅក្នុងក្របខ័ណ្ឌ Champions League ក៏មានបំណងចង់តែងតាំងគ្រូបង្វឹកក្រុមជម្រើសជាតិអាហ្សង់ទីនរូបនេះផងដែរ ដូច្នេះហើយទើប Man United និងត្រូវធ្វើការប្រជែងនាំយកអតីតអ្នកចាត់ការទូទៅក្រុមមាន់ខ្នាយមាស Tottenham Hotspur មករួមក្រុមនៅរដូវក្តៅនេះ។ គួរបញ្ជាក់ផងដែរថាលោក Rangnick នឹងត្រូវដឹកនាំ Man. Utd ធ្វើការប្រកួតរហូតបញ្ចប់រដូវកាលនេះ មុនពេលចូលកាន់តួនាទីជាទីប្រឹក្សាផ្តល់យោបល់សម្រាប់ក្លឹប ។ មានការលើកឡើងផងដែរថាលោក Rangnick ចង់ឱ្យអ្នកចាត់ការក្លឹបយក្សហូឡង់ Ajaxគឺលោក Erik ten Hag មកបន្តតំណែងពីរូលោក ប៉ុន្តែទោះយ៉ាងណាលោក Pochettino នៅតែទំនងជាគោលដៅទីមួយសម្រាប់ Man. Utd។
Man United នៅតែសម្លឹង នឹងប្រឈមការប្រជែងដើម្បីបញ្ចប់រដូវកាលយកចំណាត់ថ្នាក់កំពូលទាំងបួននៅក្របខណ្ឌ Premier League នារដូវកាលនេះ ក្រោយបានត្រឹមទទួលលទ្ធផលស្មើគ្នា កាលពីថ្ងៃសៅរ៍ជាមួយ Aston Villa និងមានគម្លាតពីក្រុមលេខ៤West Ham Utd ដែលចាញ់Leeds Utd កាលពីថ្ងៃអាទិត្យចំនួន៥ពិន្ទុ៕
ប្រភពព័ត៍មាន៖ Sportsmole
