បរទេស៖ Brentford បានធ្វើការទំនាក់ទំនងជាមួយនិងអតីតខ្សែបម្រើក្រុមមាន់ខ្នាយមាស Tottenham កីឡាករ Christian Eriksen អោយវិលត្រលប់មកលេងនៅក្របខណ្ឌ Premier League សាជាថ្មីវិញកំលុងពេលទីផ្សារដោះដូរកីឡាករកំពុងបើកដំណើរការជាលើកទីពីរនៅខែមករា ២០២២នេះ។
គួររំលឹកថា Eriksen ត្រូវបានក្លឹបយក្សអ៊ីតាលី Inter Milan សម្រេចបញ្ចប់កុងត្រាដោយផ្អែកលើការយល់ព្រមគ្នា កាលពីខែធ្នូឆ្នាំមុន បន្ទាប់ពីមិនអាចលេងបន្តអាជីពនៅក្របខ័ណ្ឌ Serie A ក្រោយពីរូបគេត្រូវបានបំពាក់ឧបករណ៍ជំនួយដំណើរនិងតាមដាន ចង្វាក់បេះដូង បន្ទាប់ពីជួបបញ្ហាគាំងបេះដូងកំលុងពេលប្រកួតអោយក្រុមជម្រើសជាតិដាណឺម៉ាកនិងហ្វាំងឡង់ នៅព្រឹត្តិការណ៏ Euro ២០២០ កាលពីខែមិថុនាឆ្នាំមុន។
ក្រុមរហស្សនាមសត្វឃ្មុំបច្ចុប្បន្នកំពុងឈរនៅលេខរៀងទី ១៤ ក្នុងក្របខ័ណ្ឌ Premier League ដែលជាយុទ្ធនាការកំពូលលើកដំបូងរបស់ពួកគេគិតចាប់តាំងពីរដូវកាល ១៩៤៦-១៩៤៧ ។Eriksen បានឈ្នះពានរង្វាន់លីកកំពូលអ៊ីតាលីជាមួយក្លឹប Inter Milan កាលពីរដូវកាលមុន ហើយក្រោយចែកផ្លូវគ្នា ជាមួយ Inter Milan រួចមកអតីតយុវជនក្លឹប Ajax ចាប់ផ្តើមហ្វឹកហាត់តែម្នាក់ឯងនៅក្នុងប្រទេសដាណឺម៉ាកជាមួយក្លឹបពីកុមារភាព។ ទោះយ៉ាងណាកីឡាករវ័យ ២៩ ឆ្នាំមានបំណងចង់បន្តអាជីពលេងរបស់គាត់បន្តទៀតនិងមិនទាន់ចង់ចូលនិវត្តន៏នោះទេ ដោយEriksen ធ្លាប់បានលើកឡើងពីក្តីសុបិនរបស់ខ្លួនថានិងមានឪកាសចូលលេងអោយក្រុមជម្រើសជាតិ ដាណឺម៉ាកក្នុងព្រឹត្តិការណ៍ World Cup ឆ្នាំ ២០២២ នៅក្នុងប្រទេសកាតា៕
ប្រភពព័ត៍មាន៖ BBC
