បរទេស៖ លោក Ralf Rangnick បានសន្យាថា នឹងដាក់ឲ្យ Paul Pogba ចូលលេង បើទោះបីខ្សែបម្រើរបស់ក្លិប Manchester United រូបនេះ កំពុងតែមានឱកាសក្នុងការចាកចេញពីកីឡដ្ឋាន Old Traffod ក៏ដោយ។
Pogba នឹងផុតកំណត់កិច្ចសន្យារបស់គេនៅចុងរដូវកាលនេះ និងមិនទាន់ចុះកុងត្រាថ្មីជាមួយនឹងក្លិបដែលរូបគេបានចូលរួមពីក្លិប Juvenuts ក្នុងឆ្នាំ២០១៦ នៅឡើយទេ។ អនាគតរបស់កីឡាករវ័យ២៨ឆ្នាំរូបនេះ បានក្លាយជាប្រធានបទក្តៅនៅប្រទេសបារាំង ស្ទើរតែគ្រប់រដូវកាលនៅឯក្លិប Man United។ លោក Mino Raiola ដែលជាភ្នាក់ងារតំណាងឲ្យ Pogba បានទាក់ទងទៅកាន់ក្លិប Paris Saint-Germain អំពីការផ្ទេរមួយ ទៅកាន់ក្របខ័ណ្ឌ Ligue 1 នៅរដូវក្តៅនេះ។ សមាជិកឈ្នះពាន World Cup ជាមួយនឹងក្រុមជម្រើសជាតិបារាំងរូបនេះ បានវិលទៅហ្វឹកហាត់វិញជាមួយនឹងក្លិប Man United កាលពីថ្ងៃចន្ទ ជាលើកដំបូង បើគិតចាប់តាំងពីរងរបួសភ្លៅ កាលពីខែវិច្ឆិកា។
នៅពេលដែលត្រូវបានចោទសួរថា Pogba នឹងត្រូវដាក់ឲ្យចូលលេង ឬអត់ ស្របពេលដែលកិច្ចសន្យារបស់គេនៅក្លិប Man United ជិតផុតកំណត់ លោក Rangnick គ្រូបង្វឹកបណ្តោះអាសន្នបានឆ្លើយថា៖ «បាទ ប្រាកដហើយ។ ខ្ញុំក៏បានដាក់ឲ្យ Nemanja Matic ចូលលេងការប្រកួតប៉ុន្មានលើកចុងក្រោយនៅពេលនេះផងដែរ ហើយកិច្ចសន្យារបស់គេ ក៏ជិតផុតកំណត់ផងដែរ។ ជាមួយគ្នានេះ កិច្ចសន្យារបស់ខ្ញុំក្នុងនាមជាអ្នកចាត់ការទូទៅ ក៏ជិតផុតកំណត់ផងដែរ នៅរដូវក្តៅនេះ»៕
ប្រភពព័ត៌មាន៖ Channel News Asia