បរទេស៖ ក្រុមម្ចាស់ជើងឯក៧សម័យកាល អេហ្ស៊ីប បានកក់កៅអីរបស់ខ្លួនក្នុងវគ្គ១៦ក្រុមចុងក្រោយនៃព្រឹត្តិការណ៍ Africa Cup of Nations កាលពីថ្ងៃពុធ តាមរយៈការផ្តួលក្រុមជិតខាង ស៊ូដង់ ក្នុងលទ្ធផល ១-០ ស្របពេលដែលលទ្ធផលនេះ បានជួយឲ្យក្រុម៥ផ្សេងទៀត ឈានទៅវគ្គបន្ត ក្នុងនោះរាប់ទាំងក្រុមជម្រើសជាតិកូតឌីវ័រ ផងដែរ។
ក្រុមជម្រើសជាតិនីហ្សេរីយ៉ា បានបញ្ចប់ការប្រកួតក្នុងពូល D ដោយឈ្នះទាំង៣លើកជាប់ៗគ្នា ខណៈដែលពួកគេបានផ្តួលក្រុមជម្រើសជាតិហ្គីណេ ប៊ីស៊ូ ២-០ ដែលនាំឲ្យក្រុមឈរលេខ២ អេហ្ស៊ីប ត្រូវប៉ះជាមួយនឹងក្រុមឈរលេខ១ក្នុងពូល E នៅជុំបន្ទាប់ ដែលអាចនឹងត្រូវប៉ះ កូតឌីវ័រ។ គ្រាប់បាល់តែតបញ្ចូលទីពីកីឡាករ Mohamed Abdelmonem នៅរយៈពេល១០ចុងក្រោយក្នុងតង់ទី១ ក្នុងទីក្រុង Yaounde បានជួយឲ្យក្រុមជម្រើសជាតិអេហ្ស៊ីប ទៅវគ្គបន្ត ហើយក្រុមស៊ូដង់ ត្រូវកាត់ចេញ ស្របពេលដែលក្រុមជម្រើសជាតិកូតឌីវ័រ ម៉ាលី ហ្គំប៊ី ម៉ាឡាវី និងកាប់វែរ ក៏ឈ្នះកៅអីទៅវគ្គបន្តផងដែរ ដោយមិនទាន់សូម្បីតែធ្វើការប្រកួតចុងក្រោយរបស់ខ្លួនក្នុងពូលក៏ដោយ។
លោក Carlos Queiroz គ្រូបង្វឹកនៃក្រុមជម្រើសជាតិអេហ្ស៊ីប បានឲ្យដឹងថា៖ «ខ្ញុំគិតថា Egypt សក្តិសមនឹងឈ្នះការប្រកួតនេះ ដោយគ្មានការសង្ស័យ បើនិយាយពីឱកាសនានា ដែលយើងបានបង្កើត និងកីឡាបាល់ទាត់ដែលយើងបានលេង»៕
ប្រភពព័ត៌មាន៖ Channel News Asia