បរទេស៖ Athletico Madrid មិនមានចេតនាអនុញ្ញាតឱ្យខ្សែប្រយុទ្ធជើងចាស់ Luis Suarez ចាកចេញពីទឹកដី Wanda Metropolitano ក្នុងអំឡុងពេលទីផ្សារដោះដូរកីឡាករដែលកំពុងបើកដំណើរការជាលើកពីរនៅខែមករា២០២២នេះទេ។
ទោះបីជានៅតែបង្ហាញទម្រង់លេងបានល្អដោយស៊ុតបញ្ចូលទីបាន ៩ គ្រាប់គ្រប់ក្របខណ្ឌប្រកួតទាំងអស់ក្នុងរដូវកាលនេះទោះយ៉ាងណាកីឡាករអន្តរជាតិអ៊ុយរូហ្គាយវ័យ ៣៤ ឆ្នាំរូបនេះមិនត្រូវបានចាត់ទុកថាជាជម្រើសដំបូងសម្រាប់ក្រុមគ្រូបង្វឹកអាហ្សង់ទីនលោក Diego Simeone បន្តទៅទៀតនោះទេ។ ជាមួយនឹងកិច្ចសន្យាដែលនៅសល់តិចជាងប្រាំមួយខែ យោងគេហទំព័រ Goal បានចុះផ្សាយថាៈ ក្រុមការពារតំណែងជើងឯកLa Liga បច្ចុប្បន្នមិនទាន់បានត្រៀមខ្លួនដើម្បីចែកផ្លូវជាមួយSaurez នៅកំលុងពេលវេលាពាក់កណ្តាលនៃយុទ្ធនាការរដូវកាលនេះនោះទេ។
ទោះយ៉ាងណាSuarez នៅតែស្ថិតក្នុងជំហរដែលអាចពិភាក្សាក្នុងការផ្លាស់ទៅកាន់ក្លឹបនៅលីកកំពូលផ្សេងទៀតជាមួយនិងការផ្ទេរដោយគ្មានតម្លៃខ្លួន(Free Transfer) នៅពេលបញ្ចប់កិច្ចសន្យារបស់គាត់ឈានដល់ទីបញ្ចប់។ក្រៅពីAston Villa នៅមានក្លឹបក្នុងប្រទេសប្រេស៊ីល និងអារ៉ាប៊ីសាអូឌីតក៏កំពុងតាមដានស្ថានការណ៍របស់ខ្សែប្រយុទ្ធរូបនេះផងដែរ៕
ប្រភពព័ត៍មាន៖Sportsmole
