បរទេស៖ ខ្សែប្រយុទ្ធ Luis Suarez បាននិយាយថា រូបគេនឹងតែងតែមានក្លិប Atletico Madrid ក្នុងបេះដូងរបស់គេជានិច្ច ក្រោយពីតារាឆ្នើមរូបនេះ បាននិយាយថា លាហើយទៅកាន់អ្នកគាំទ្រ ក្រោយពីបានបញ្ចប់ក្នុងលទ្ធផលស្មើ ១-១ ជាមួយនឹងក្រុម Sevilla កាលពីថ្ងៃអាទិត្យ។
លទ្ធផលនេះ មានន័យថា ក្រុម Sevilla នឹងត្រូវបញ្ចប់ក្នុងចំណាត់ថ្នាក់លេខ៤នៅលើតារាងក្របខ័ណ្ឌ La Lig ខណៈដែលគ្រាប់បាល់តាមស្មើរបស់កីឡាករ Youssef En-Nesyri នាកីឡដ្ឋាន Wanda Metropoliano បានជួយឲ្យក្រុមខ្លួនឈ្នះកៅអីទៅលេងក្នុងក្របខ័ណ្ឌ Champions League។ ផ្ទាំងបដារដ៏ធំមួយដែលត្រូវបានបង្ហាញនៅកៅអីរបស់អ្នកគាំទ្រ នៅមុនពេលការប្រកួត បានសរសេរថា៖ «អរគុណអ្នកច្រើនចំពោះការជួយយើងឲ្យក្លាយជាជើងឯក»។ ស្របពេលជាមួយគ្នានេះ Suarez ត្រូវបានគេមើលឃើញថា បានបង្ហូរទឹកភ្នែក នៅពេលដែលរូបគេ និងគ្រួសាររបស់គេ ដើរនៅលើទីលានប្រកួត បន្ទាប់បញ្ចប់ការប្រកួត។
កីឡាករវ័យ៣៥ឆ្នាំរូបនេះ នឹងត្រូវចាកចេញពីក្លិប Atletico នៅពេលដែលកិច្ចសន្យារយៈពេល២ឆ្នាំរបស់គេផុតកំណត់នៅរដូវក្តៅនេះ។ ក្រោពីត្រូវបានបង្ខំឲ្យចាកចេញពីក្លិប Barcelona ក្នុងឆ្នាំ២០២០ Suarez បានបង្កើតការសងសឹងតាមរយៈការបង្ហាញពីកម្រិតលេងយ៉ាងមុតស្រួចក្នុងពេលក្រុម Atletico បានលើកពាន La Liga កាលពីរដូវកាលមុន ដែលនៅពេលនោះរូបគេបានស៊ុតបាល់លើដៃគូសរុប២១គ្រាប់ ក្នុងការបង្ហាញខ្លួន៣២លើក និងបានបញ្ចប់ក្នុងនាមជាអ្នករកបានគ្រាប់បាល់ច្រើនជាងគេ៕
ប្រភពព័ត៌មាន៖ Channel News Asia