បរទេស៖ ក្រុមម្ចាស់ផ្ទះ កាមេរូន បានឈានទៅវគ្គ៨ក្រុមចុងក្រោយនៃព្រឹត្តិការណ៍ Africa Cup of Nations ប៉ុន្តែ បានឈ្នះទាំងលំបាកក្នុងលទ្ធផល ២-១ លើក្រុមជម្រើសជាតិកូម៉ូរ៉ូស ដែលត្រូវបង្ខំចិត្ត ប្រើប្រាស់កីឡាករក្រៅប្រអប់ទី ដើម្បីដើរតួជាអ្នកចាំទី និងបានលេងការប្រកួតជាច្រើននាទីជាមួយនឹងសមាជិកត្រឹមតែ១០នាក់។
ក្រុមជម្រើសជាតិកូម៉ូរ៉ូស បានដាក់ខ្សែការពារស្លាបឆ្វេង Chaker Alhadhur ជាអ្នកចាំទី ក្នុងទីក្រុង Yaounde ក្រោយពីអ្នកចាំទី២នាក់ក្នុងចំណោមអ្នកចាំទីទាំង៣នាក់របស់ខ្លួន បានអវត្តមានដោយសារតែកូវីដ ១៩ ស្របពេលដែលកីឡាករម្នាក់ទៀត បានអវត្តមានដោយសារតែបញ្ហារបួស។ បន្ទាប់មក ប្រធានក្រុមរបស់ពួកគេ Nadjim Abdou បានរងពិន័យកាតក្រហម ក្រោយពីលេងបានត្រឹមតែរយៈពេល៧នាទី ហើយ Karl Toko-Ekambi បានជួយឲ្យក្រុមជម្រើសជាតិកាមេរូន រកបានគ្រាប់បាល់នាំមុខមុន នៅមុនពេលអ្នកចាំទី Vincent Aboubakar បានរកគ្រាប់បាល់ទី៦របស់គេក្នុងយុទ្ធនាការនេះ ប៉ុន្តែក្រុមភ្ញៀវនៅតែអាចវាយបកបាន១គ្រាប់វិញ។
ស្របពេលជាមួយគ្នានេះ កីឡាករ Musa Barrow បានរកគ្រាប់បាល់ឈ្នះនៅនាទី ទី៧១ ខណៈដែលក្រុមជម្រើសជាតិហ្គំប៊ី បានបន្តបង្កើតភាពភ្ញាក់ផ្អើលក្នុងព្រឹត្តិការណ៍ Africa Cup of Nations តាមរយៈការយកឈ្នះលើក្រុមជម្រើសជាតិហ្គីណេ ក្នុងលទ្ធផល ១-០ ក្នុងទីក្រុង Bafoussam ដើម្បីឈានទៅវគ្គ៨ក្រុមចុងក្រោយ៕
ប្រភពព័ត៌មាន៖ Channel news Asia