បរទេស៖ ខ្សែប្រយុទ្ធ Mohamed Salah បានស៊ុតបាល់ប៉េណាល់ទីកាត់សេចក្តី ខណៈដែលក្រុមបាល់ទាត់ជម្រើសជាតិអេហ្ស៊ីប បានផ្តួលក្រុមជម្រើសជាតិកូតឌីវ័រ ក្នុងបាល់ប៉េណាល់ កាលពីថ្ងៃពុធ ដើម្បីឈានទៅវគ្គ៨ក្រុមចុងក្រោយនៃព្រឹត្តិការណ៍ Africa Cup of Nations ស្របពេលដែលគណៈកម្មការរៀបចំការប្រកួត បានប្តូរការប្រកួតចំនួន២ ពីទីក្រុង Douala ទៅកាន់ទីក្រុង Yaounde របស់ប្រទេសកាមេរូន។
តារាឆ្នើមរបស់ក្លិប Liverpool រូបនេះ បានស៊ុតបាល់បំប៉ោងសំណាញ់ទីពីចំណុចពិន័យ១១ម៉ែត្រ ស្របពេលដែល Eric Bailly របស់កូតឌីវ័រ គឺជាកីឡាករតែម្នាក់ដែលស៊ុតបាល់ប៉េណាល់ទីមិនចូលទី ក្នុងទីក្រុង Douala ដោយក្រុមជម្រើសជាតិអេហ្ស៊ីប បានយកឈ្នះក្នុងលទ្ធផល ៥-៤ ក្រោយពីការប្រកួតវគ្គ១៦ក្រុមចុងក្រោយរបស់ពួកគេបានបញ្ចប់ក្នុងលទ្ធផលស្មើ ០-០ បន្ទាប់ពីនាទីបន្ថែម១៥នាទី២ដង។ អេហ្ស៊ីប ដែលជាម្ចាស់ជើងឯក៧សម័យកាល នឹងត្រូវឈានទៅជួបក្រុមជម្រើសជាតិម៉ារ៉ុក ក្នុងវគ្គ៨ក្រុមចុងក្រោយក្នុងទីក្រុង Yaounde នៅថ្ងៃអាទិត្យ ចុងសប្តាហ៍នេះ។
ស្របពេលជាមួយគ្នានេះ Santiago Eneme ក៏បានរកគ្រាប់បាល់ប៉េណាល់ទីកាត់សេចក្តីផងដែរ ខណៈដែលក្រុមបាល់ទាត់ជម្រើសជាតិហ្គីណេអេក្វាទ័រ បានផ្តួលក្រុមជម្រើសជាតិម៉ាលី ដោយការស៊ុតបាល់ប៉េណាល់ទី ក្នុងលទ្ធផល ៦-៥ ក្រោយពីក្រុមទាំង២បានបញ្ចប់ក្នុងលទ្ធផលស្មើ ០-០ បន្ទាប់ពី១៥នាទី២ដង ក្នុងទីក្រុង Limbe ដើម្បីឈានទៅវគ្គ៨ក្រុមចុងក្រោយ៕
ប្រភពព័ត៌មាន៖ Channel News Asia