បរទេស៖ Arsenal និង Tottenham Hotspur មានបំណងចង់ខ្ចីជើងខ្សែប្រយុទ្ធ Alvaro Morata មុនពេលទីផ្សារដោះដូរកីឡាករ និងបិទបញ្ចប់ជាលើកទីពីរនៅថ្ងៃចន្ទឈានចូលថ្ងៃអង្គារទី១កុម្ភៈ២០២២។
ក្លឹបគូប្រជែងដែលមានមូលដ្ឋាននៅទីក្រុងឡុងដ៍ខាងជើងទាំងពីរមានការខកចិត្តក្នុងការស្វែងរកខ្សែប្រយុទ្ធជួរមុខរបស់ពួកគេរៀងៗខ្លួនក្នុងខែមករានេះ និងប្រឈមការមិនបន្ថែមសមាជិកថ្មីណាមួយទាល់តែសោះ។ Morata ដែលកំពុងលេងខ្ចីជើងនៅ Juventus ពីក្រុមដែលជាអាណាព្យាបាលរបស់ខ្លួនគឺ Atletico Madrid កំពុងប្រឈមមុខនឹងអនាគតមិនច្បាស់លាស់ក្នុងទីក្រុង Turin បន្ទាប់ពីការមកដល់របស់ខ្សែប្រយុទ្ធវ័យក្មេង Dusan VlahovicពីFiorentina ។
កីឡាករក្រុមជម្រើសជាតិអេស្បាញរូបនេះក៏មានទំនាក់ទំនងយ៉ាងជិតស្និទក្នុងការផ្លាស់ទៅ Barcelona ប៉ុន្តែយោងគេហទំព័រ The Times បានចុះផ្សាយថាៈ Morata បច្ចុប្បន្នគឺជាចំណែកលើសសម្រាប់Juventus ខណៈ ការផ្លាស់ទៅ Barcelona ទំនងជាត្រូវរង់ចាំពីអនាគតរបស់ Ousmane Dembele ។ ក៏ប៉ុន្តែជាចុងក្រោយនេះ Morataខ្លួនឯងបានច្រានចោលការរំពឹងទុកនៃការផ្លាស់ប្តូរទៅកាន់លីកកំពូលLa Liga ជាមួយក្លឹបយក្សកាតាឡាន់វិញ។ Morata ស៊ុតបញ្ចូលទីបាន ៨ គ្រាប់ និងAssist ៥ ដងពីការបង្ហាញខ្លួន ២៩ដងគ្រប់ក្របខណ្ឌប្រកួតខណៈ កុងត្រារបស់អតីតកីឡាករChelsea និង Real MadridរូបនេះនៅទឹកដីWanda Metropolitano និងត្រូវអស់សុពលភាពនាឆ្នាំ២០២៣ខាងមុខឯណោះ៕
ប្រភពព័ត៍មាន៖ Sportsmole