បរទេស៖ Mohamed Salah បានបង្ហាញថ្វីជើង ខណៈដែលក្រុមបាល់ទាត់ជម្រើសជាតិអេហ្ស៊ីប បានឈានទៅប្រកួតក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ Africa Cup of Nations កាលពីថ្ងៃអាទិត្យ ក្រោយពីបានផ្តួលក្រុមជម្រើសជាតិម៉ារ៉ុក នៅនាទីបន្ថែម១៥នាទី២ដង ក្នុងលទ្ធផល ២-១។
ក្រុមជម្រើសជាតិសេណេហ្គាល់ ក៏បានឈានទៅវគ្គ៤ក្រុមចុងក្រោយផងដែរ ក្រោយពីបានផ្តួលក្រុមជម្រើសជាតិហ្គីណេអេក្វាទ័រក្នុងលទ្ធផល ៣-១ ស្របពេលដែលកីឡដ្ឋាន Olembe ក្នុងទីក្រុង Yaounde ដែលជាកន្លែងមានមនុស្សស្លាប់ ក្នុងពេលប្រជ្រៀតគ្នា កាលពី១សប្តាហ៍មុននោះ ត្រូវបានអនុញ្ញាតឲ្យធ្វើជាម្ចាស់ផ្ទះការប្រកួតវគ្គផ្តាច់ព្រ័ត្រ។ សហព័ន្ធកីឡាបាល់ទាត់ទ្វីបអាហ្វ្រិក បានអនុញ្ញាតឲ្យកីឡដ្ឋាននេះ ធ្វើជាម្ចាស់ផ្ទះការប្រកួតវគ្គពាក់កណ្តាលផ្តាច់ព្រ័ត្រ គូទី២ នៅថ្ងៃទី៣ ខែកុម្ភៈ រវាងក្រុមម្ចាស់ផ្ទះ និងក្រុមជម្រើសជាតិអេហ្ស៊ីប និងវគ្គផ្តាច់ព្រ័ត្រ នាថ្ងៃទី៦ ខែកុម្ភៈ ក្រោយពីបានលុបចោលការពិន័យព្យួរលើកីឡដ្ឋាននេះ ដែលជាកន្លែងមានមនុស្ស៨នាក់ស្លាប់ ក្នុងនោះរាប់បញ្ចូលទាំងកុមារម្នាក់ផងដែរ កាលពីថ្ងៃទី២៤ ខែមករា។
Egypt’s forward Mohamed Salah (C) passes the ball leading to a second team goal during the Africa Cup of Nations (CAN) 2021 quarter-final football match between Egypt and Morocco at Stade Ahmadou Ahidjo in Yaounde on January 30, 2022. (Photo by CHARLY TRIBALLEAU / AFP)
អង្គភាពគ្រប់គ្រងកីឡាបាល់ទាត់ប្រចាំទ្វីបអាហ្វ្រិកមួយនេះ បានឲ្យដឹងក្នុងសេចក្តីថ្លែងការណ៍មួយថា៖ «ក្រោយពីបានទទួលយកអនុសាសន៍ និងការណែនាំពីរដ្ឋាភិបាល ទាក់ទងនឹងនីតិវិធីសន្តិសុខបន្ថែម គណៈកម្មការរៀបចំការប្រកួត Africa Cup of Nations បានយល់ស្របដើម្បីលើកការព្យួរដែលត្រូវបានដាក់លើកីឡដ្ឋាន Olembe»៕
ប្រភពព័ត៌មាន៖ Channel News Asia
