បរទេស៖ ក្រុមបាល់ទាត់ជម្រើសជាតិវៀតណាម បានយកឈ្នះលើក្រុមជម្រើសជាតិចិន ក្នុងលទ្ធផល ៣-១ ក្នុងការប្រកួតជម្រុះ World Cup កាលពីថ្ងៃអង្គារ ដើម្បីនាំឲ្យមានការអបអរយ៉ាងខ្លាំងក្លា ក្នុងចំណោមអ្នកគាំទ្រនៅទីក្រុងហាណូយ ស្របពេលដែលប្រទេសទាំង២ កំពុងតែអបអរថ្ងៃចូលឆ្នាំថ្មី។
ការដណ្តើមបានជ័យជម្នះដ៏មិននឹកស្មានដល់នេះ បានជួយឲ្យក្រុមជម្រើសជាតិវៀតណាម កត់ត្រាជ័យជម្នះជាលើកដំបូងរបស់ខ្លួន ក្នុងការប្រកួតជម្រុះនេះ ក្រោយពីបានរងបរាជ័យ៧លើកជាប់ៗគ្នា។ នេះក៏ជាលើកទី១ផងដែរ ដែលក្រុមជម្រើសជាតិវៀតណាម បានយកឈ្នះលើក្រុមជម្រើសជាតិចិន។ កីឡាករ Do Hung Dung ប្រធានក្រុមនៃក្រុមជម្រើសជាតិវៀតណាម បានប្រាប់អ្នកយកព័ត៌មានថា៖ «យើងតែងតែព្យាយាមរកឲ្យបានពិន្ទុច្រើនបំផុត នៅពេលដែលយើងលេងលើទឹកដីខ្លួនឯង។
ហើយជាសំណាងល្អ នៅថ្ងៃនេះ យើងបានឈ្នះពេលប្រកួតជាមួយនឹងក្រុមជម្រើសជាតិចិន នៅថ្ងៃទី១នាឱកាសចូលឆ្នាំថ្មី»។ ស្របពេលជាមួយគ្នានេះ ក្រុមបាល់ទាត់ជម្រើសជាតិកូរ៉េខាងត្បូង បានផ្តួលក្រុមជម្រើសជាតិស៊ីរី ក្នុងលទ្ធផល ២-០ ក្នុងទីក្រុងឌូបៃ ដើម្បីឈានទៅប្រកួត World Cup ជុំផ្តាច់ព្រ័ត្រ ជាលើកទី១០ជាប់ៗគ្នារបស់ពួកគេ។ កូរ៉េ ដែលបានបង្ហាញខ្លួនក្នុងរាល់យុទ្ធនាការ World Cup ទាំងអស់ បើគិតចាប់តាំងពីនៅម៉ិកស៊ិ ឆ្នាំ១៩៨៦ និងបានបញ្ចប់ក្នុងចំណាត់ថ្នាក់លេខ៤ ពេលពួកគេបានធ្វើជាសហម្ចាស់ផ្ទះរៀបចំ World Cup ឆ្នាំ២០០២នោះ នឹងធ្វើដំណើរទៅប្រទេសកាតា រួមជាមួយនឹងអ៊ីរ៉ង់ ដែលបានឈ្នះកៅអីរួចជាស្រេចពូល A៕
ប្រភពព័ត៌មាន៖ Channel News Asia