វិមានពហុកីឡដ្ឋានជាតិមរតកតេជោ ដែលបានចំណាយថវិកាសាងសង់អស់ប្រមាណ១៥០លានដុល្លារ ជាជំនួយឥតសំណងរបស់ប្រទេសចិននោះ នឹងចាប់បើកទទួលអ្នកទស្សនា ឱ្យចូលរួមផ្ទាល់ ជាលើកដំបូង នៅក្នុងការប្រកួតជើងឯកបាល់ទាត់តំបន់អាស៊ីអាគ្នេយ៍ អាយុក្រោម២៣ឆ្នាំ (AFF U23 Championship 2022) ដែលចាប់ផ្តើមពីថ្ងៃទី១៤ ដល់ថ្ងៃទី២៦ ខែកុម្ភៈ ឆ្នាំ២០២២។
ជាមួយគ្នានេះ សហព័ន្ធកីឡាបាល់ទាត់កម្ពុជា (FFC) បានប្រកាសពីការលក់សំបុត្រ សម្រាប់ការចូលរួមទស្សនា ការប្រកួតពានរង្វាន់ AFF U23 Championship 2022 នេះ ជាផ្លូវការ កាលពីថ្ងៃពុធ ហើយតាមរយៈចំនួនសំបុត្រ ដាក់លក់នេះ គឺមានមនុស្សត្រឹម២៦៤៣៩នាក់ប៉ុណ្ណោះ នឹងចូលទស្សនាផ្ទាល់ ជាលើកដំបូង នៅក្នុងពហុកីឡដ្ឋានថ្មី ដ៏ទំនើបមួយនេះ។
តាមពិត ពហុកីឡដ្ឋានជាតិមរតកតេជោ អាចផ្ទុកអ្នកទស្សនាបានដល់៦ម៉ឺននាក់ ប៉ុន្តែដើម្បីចូលរួមការការពារជំងឺឆ្លងកូវីដ FFC បានកំណត់ឱ្យអ្នកទស្សនាចូលរួមផ្ទាល់ត្រឹម៥០ភាគរយ នៃចំនួនកៅអីសរុប ហើយក៏បានកាត់កៅអីក្រោយចំនួន៥០ភាគរយចេញផងដែរ ចំណែកប្រភេទសំបុត្រទស្សនា ត្រូវបានចែកចេញជា៤ប្រភេទ រីឯគំរូប្លង់អង្គុយនៃប្រភេទសំបុត្រទាំង៤នេះ ត្រូវបាន FFC បង្ហាញយ៉ាងច្បាស់ កាលពីព្រឹកថ្ងៃព្រហស្បតិ៍នេះ។
តាមការប្រកាសរបស់ FFC បានឱ្យដឹងថា សំបុត្រចូលទស្សនាការប្រកួតពានរង្វាន់ AFF U23 Championship 2022 នៅពហុកីឡដ្ឋានជាតិមរតកតេជោ នឹងចាប់ផ្ដើមដាក់លក់ នៅថ្ងៃទី១០ ខែកុម្ភៈ ខាងមុខនេះ ដោយក្នុងនោះ សំបុត្រប្រភេទ ១តម្លៃ ៣០០០០រៀល មានចំនួន ៦៧៨៩ កៅអី សំបុត្រប្រភេទ២ តម្លៃ ២០០០០រៀល មានចំនួន ៣០២៩ កៅអី សំបុត្រប្រភេទ៣ តម្លៃ ១៤០០០រៀល មានចំនួន ៩៧៧៣ កៅអី និងសំបុត្រប្រភេទ៤ តម្លៃ ៨០០០រៀល មានចំនួន ៦៨៤៨ កៅអី។
យ៉ាងណាក៏ដោយ សហព័ន្ធកីឡាបាល់ទាត់កម្ពុជា នៅមិនបានប្រាប់ពីទីតាំងលក់សំបុត្រ ព្រមទាំងប្រាប់ពីលក្ខខណ្ឌ និងវិធានការ ក្នុងការចូលទស្សនា នៅឡើយទេ ប៉ុន្តែចំពោះការបរិច្ឆេទនៃការប្រកួត នៅតាមពូលទាំង៣ នៃពានរង្វាន់មួយនេះ ត្រូវបាន FFC កំណត់ច្បាស់រួចរាល់អស់ហើយ ដោយក្នុងនោះ ការប្រកួតជម្រុះ៦លើក រួមទាំងការប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ត្រូវធ្វើនៅពហុកីឡដ្ឋានជាតិមរតកតេជោ ខណៈការប្រកួតផ្សេងទៀត ត្រូវធ្វើនៅកីឡដ្ឋានព្រីនស៍ របស់ក្លិបវិសាខា។
គួរបញ្ជាក់ថា ក្រុមតំណាងឱ្យប្រទេសទាំង១១ នៅក្នុងតំបន់អាស៊ាននេះ សុទ្ធតែបានចូលរួម នៅក្នុងការប្រកួតពានរង្វាន់ AFF U23 Championship 2022 នេះ ដោយក្រុមទាំង១១នេះ ត្រូវបានបែងចែកជា៣ពូល ក្នុងនោះពូលA មានកម្ពុជា ទីម័រខាងកើត ហ្វីលីពីន ប្រ៊ុណនេ ឯពូលB មានក្រុមឥណ្ឌូនេស៊ី ម៉ាឡេស៊ី មីយ៉ាន់ម៉ា និងឡាវ ហើយពូលC មានក្រុមវៀតណាម ថៃ និងសិង្ហបុរី។ ចំណែកការប្រកួតបើកឆាក នឹងត្រូវធ្វើនៅថ្ងៃទី១៤ ខែកុម្ភៈនេះ ដើម្បីរកក្រុមលេខ១ តាមពូលទាំង៣ រួមទាំងក្រុមលេខ២ល្អចំនួន១ក្រុមទៀត សរុប៤ក្រុម ឡើងទៅប្រកួតនៅវគ្គពាក់កណ្តាលផ្តាច់ព្រ័ត្រនិងវគ្គផ្តាច់ព្រ័ត្រ៕
