សមាជិករបស់ក្រុមជម្រើសជាតិកម្ពុជាអាយុក្រោម២៣ឆ្នាំ នឹងត្រូវធ្វើការប្រកួតជម្រុះលើកទី២ ប្រចាំពូលA នៃពាន AFF U23 Championship 2022 ជាមួយក្រុមU23ហ្វីលីពីន នៅពហុកីឡដ្ឋានជាតិមរតកតេជោ នាយប់ថ្ងៃព្រហស្បតិ៍នេះ គឺបន្ទាប់ពីការប្រជែងគ្នារវាងក្រុមទីម័រខាងកើត និងក្រុមប្រ៊ុយណេ ដែលចាប់ប្រកួត ពីរសៀលម៉ោង៤ទៅ។
សម្រាប់ការប្រកួតលើកនេះ ទាំងកម្ពុជា និងហ្វីលីពីន សុទ្ធតែត្រូវការឈ្នះរៀងៗខ្លួន ដើម្បីបង្កើនឱកាសបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ ព្រោះការប្រកួតបើកឆាក កាលពីថ្ងៃចន្ទ កន្លងមកនេះ កម្ពុជា បានយកឈ្នះក្រុមប្រ៊ុយណេ ៦-០ ចំណែកក្រុមហ្វីលីពីន បានត្រឹមស្មើ ២-២ ជាមួយទីម័រខាងកើត។
យ៉ាងណាក៏ដោយ សម្រាប់ការប្រកួតនេះ ត្រូវបានគេមើលឃើញថា កម្ពុជា អាចមានតែមជាង ព្រោះជាក្រុមម្ចាស់ផ្ទះ ដែលមានអ្នកគាំទ្ររាប់ម៉ឺននាក់ ចាំលើកទឹកចិត្ត ហើយបន្ថែមលើនេះ ការលត់ក្រុមប្រ៊ុយណេ ៦-០ កន្លងមកនេះ វាកំពុងតែធ្វើឱ្យក្រុមគោព្រៃជំទង់កម្ពុជា មានកម្លាំងចិត្តកាន់តែខ្លាំង ក្នុងការប្រជែងយក៣ពិន្ទុ ជាមួយហ្វីលីពីន លើកនេះ។
លើសពីនេះទៅទៀត សមាជិកក្រុមU23កម្ពុជា ចំនួន៦នាក់ រួមមានខ្សែការពារ ទេស សម្បត្តិ, យ៉ើ សាហ្វី, សឿត បារាំង អ្នកចាំទី ហ៊ុល គឹមហ៊ុយ ព្រមទាំងខ្សែប្រយុទ្ធ ម៉ៅ ពិសិដ្ឋ និង សៀង ចន្ធា សុទ្ធតែបានលេងជាមួយក្រុមហ្វីលីពីន នៅក្នុងការប្រកួតស៊ីហ្គេម កាលឆ្នាំ២០១៩ ដោយកាលនោះ ក្រុមទាំង២ បានស្មើគ្នា ១-១ ហើយវាក៏ជាពេលដែលកម្ពុជា បានឡើងទៅកាន់វគ្គពាក់កណ្តាលផ្តាច់ព្រ័ត្រ ជាប្រវត្តិសាស្រ្ត ផងដែរ។
ជាមួយបទពិសោធរបស់អ្នកទាំង៦នេះ អាចបញ្ជាក់បានថា កម្ពុជា មានភាពចាស់ទុំជាងក្រុមហ្វីលីពីន ជុំវិញទៅនឹងបទពិសោធ និងបច្ចេកទេសលេង នៅលើទីលាន ព្រោះការប្រកួតពាន AFF U23 Championship 2022 នេះ ហ្វីលីពិន បានដាក់កីឡាករចំណូលថ្មីស្ទើតែទាំងអស់ ហើយលោក Stewart Hall ក៏បានទទួលស្គាល់ដែរថា ការជួបកម្ពុជា នៅថ្ងៃនេះ វាអាចពិបាកជាង ពេលជួបក្រុមទីម័រ កាលពីថ្ងៃចន្ទ។
គ្រូបង្គោលក្រុមU23ហ្វីលីពីន បាននិយាយ ក្រោយស្មើ ២–២ ជាមួយក្រុមទីម័រខាងកើត នាការប្រកួតបើកឆាកថា៖ «ក្រុមទីម័រខាងកើត បានផ្តល់បញ្ហាខ្លះដល់ពួកយើង ហើយកម្ពុជា នឹងផ្តល់ឱ្យយើងនូវបញ្ហាផ្សេងៗគ្នា នៅក្នុងការប្រកួតបន្ទាប់របស់យើង។ តែទោះបីជាយ៉ាងណា យើងមិនស្ថិត នៅក្រោមសម្ពាធទេ ព្រោះពេលនេះ យើងកំពុងព្យាយាមបង្កើនកីឡាករជំនាន់ថ្មី ហើយវាសំខាន់ណាស់ ដែលយើងលេងបាល់ឱ្យបានល្អ ជាមួយនឹងផ្នត់គំនិតថ្មី»៕