ការប្រកួតបើកឆាកប្រចាំពូលB នៃពានរង្វាន់ AFF U23 Championship 2022 រវាងក្រុមជម្រើសជាតិមីយ៉ាន់ម៉ាអាយុក្រោម២៣ឆ្នាំ និងក្រុមម៉ាឡេស៊ី ដែលនឹងត្រូវធ្វើនៅកីឡដ្ឋានព្រីនស៍ នាថ្ងៃអង្គារនេះ មិនអាចធ្វើទៅបាននោះទេ ខណៈក្រុមមីយ៉ាន់ម៉ា បានសម្រេចដកខ្លួនចេញភ្លាមៗនោះ។
ចំពោះបញ្ហានេះ សហព័ន្ធកីឡាបាល់ទាត់មីយ៉ាន់ម៉ា (MFF) បានជូនដំណឹងដល់សហព័ន្ធកីឡាបាល់ទាត់អាស៊ាន (AFF) នៅថ្ងៃនេះថា ពួកគេ បានដកខ្លួនចេញពីពានរង្វាន់ AFF U23 Championship 2022 នេះហើយ ដោយសារផលវិបាកនៃជំងឺកូវីដ១៩ ដែលបានវាយលុកទៅលើក្រុមរបស់ខ្លួន។
តាមសេចក្តីជូនដំណឹងនោះ បានបង្ហាញថា ជាផ្នែកនៃវិធានការសុខភាព និងសុវត្ថិភាពសម្រាប់ការប្រកួត ដែលកំពុងដំណើរការ គឺក្រុម U23 មីយ៉ាន់ម៉ា បានឆ្លងកាត់ការធ្វើតេស្តជាប្រចាំ មុន និងក្រោយពេលមកដល់កម្ពុជា ហើយបន្ទាប់ពីការបញ្ជាក់ពីការធ្វើតេស្តវិជ្ជមាន ក្នុងចំណោមកីឡាករមួយចំនួន ការសម្រេចចិត្តមួយត្រូវបានធ្វើឡើង ដើម្បីដកក្រុមចេញពីការប្រកួត ដើម្បីជួយកាត់បន្ថយ ហានិភ័យនៃការឆ្លងបន្ថែមទៀត ព្រោះកីឡាករ និងបុគ្គលិក ដែលត្រូវបានគេកំណត់ថា ជាអ្នកមានទំនាក់ទំនងជិតស្និទ្ធ ក៏ត្រូវបានដាក់ឱ្យនៅដាច់ដោយឡែក សម្រាប់ការសង្កេតបន្ថែមផងដែរ។
ជាមួយគ្នានេះ លោកនាយឧត្តមសេនីយ៍ ខៀវ សាម៉េត ប្រធានសហព័ន្ធកីឡាបាល់ទាត់អាស៊ីអាគនេយ៍ (AFF) និងជាអនុប្រធានសហព័ន្ធកីឡាបាល់ទាត់កម្ពុជា បានថ្លែងថា៖ «យើងពិតជាមានការសោកស្តាយជាខ្លាំង ដែលក្រុម U23 មីយ៉ាន់ម៉ា ត្រូវដកខ្លួនចេញពីពានរង្វាន់ AFF U23 Championshipនេះ»។
លោកបានបន្ថែមថា៖«យើងយល់ថា ក្រុមនេះកំពុងព្យាយាមចាប់ផ្តើមយុទ្ធនាការរបស់ពួកគេ ហើយអ្នកគាំទ្របានអន្ទះសារចង់ចាប់ក្រុមឱ្យធ្វើសកម្មភាព។ ទោះជាយ៉ាងណាក៏ដោយ សុខភាព និងសុវត្ថិភាពរបស់អ្នកគ្រប់គ្នា ដែលពាក់ព័ន្ធ គឺមានសារៈសំខាន់បំផុត ហើយយើងយល់ច្បាស់អំពីការសម្រេចចិត្ត ដែលបានធ្វើឡើងនេះ។ យើងសូមជូនពរសមាជិកដែលរងផលប៉ះពាល់ បានជាសះស្បើយពេញលេញ និងឆាប់រហ័ស»៕
