សហព័ន្ធកីឡាបាល់ទាត់វៀតណាម បានបន្ថែមកីឡាករចំណូលថ្មីចំនួន៦នាក់ ដើម្បីឱ្យមកចូលរួមជួយដល់ក្រុមU23ជម្រើសជាតិរបស់ខ្លួន ដែលនឹងត្រូវប្រកួតជម្រុះលើកចុងក្រោយ ប្រចាំពូលC ជាមួយក្រុមU19ជម្រើសជាតិថៃ នៃពានរង្វាន់ AFF U23 Championship 2022 នៅលើទឹកដីកម្ពុជា នាយប់ម៉ោង៧ ថ្ងៃអង្គារនេះ។
ការសម្រេចបន្ថែមកីឡាករថ្មីនេះ ក៏ព្រោះតែក្រុមវៀតណាម នៅសល់សមាជិកអាចលេងបានត្រឹម១៣នាក់ គឺតិចជាងការកំណត់នៃការចុះបញ្ជីឈ្មោះ មុនការប្រកួតចាប់ផ្តើម ដែលត្រូវមានកីឡាករយ៉ាងតិច១៤នាក់ ហើយការនៅសល់កីឡាករត្រឹម១៣នាក់នេះ ព្រោះតែកីឡាករផ្សេងទៀតរបស់វៀតណាម បានឆ្លងជំងឺកូវីដ១៩ រីឯអ្នកខ្លះ បានពាក់ព័ន្ធផ្ទាល់ ជាមួយអ្នកវិជ្ជមានកូវីដ ដែលត្រូវបានដាក់ឱ្យនៅដាច់ដោយឡែក។
យ៉ាងណាក៏ដោយ សម្រាប់ការបន្ថែមកីឡាករ នៅកំឡុងពេលការប្រកួត កំពុងចាប់ផ្តើមបែបនេះ ត្រូវបានប្រភពបញ្ជាក់ថា មិនខុសទៅនឹងលក្ខខណ្ឌនៃការប្រកួតនេះទេ ព្រោះនៅក្នុងលក្ខខណ្ឌ ដែលសហព័ន្ធកីឡាបាល់ទាត់អាស៊ីអាគ្នេយ៍ (AFF) បានកំណត់នៅក្នុងការប្រកួតពានរង្វាន់ AFF U23 Championship 2022 នេះ គឺក្រុមនីមួយៗ អាចបន្ថែមកីឡាករបាន ក្នុងពេលមានបញ្ហាបន្ទាន់ភ្លាមៗ ដោយសារវិបត្តិជំងឺកូវីដ១៩ បែបនេះ តែការថែមអ្នកថ្មីចូលនេះ គឺមិនឱ្យលើស១០នាក់ឡើយ។
តាមព័ត៌មានផ្លូវការ វៀតណាម បានបញ្ជូនកីឡាករចំនួន៤នាក់ មកដល់កម្ពុជាហើយ ហើយអ្នកទាំង៤នេះ អាចចូលលេង នៅក្នុងជំនួបជាមួយក្រុមថៃ នៅកីឡដ្ឋានព្រីនស៍ នាយប់ថ្ងៃនេះបាន ចំណែក២នាក់ទៀត វៀតណាម នឹងបញ្ចូនមកតាមក្រោយ ដើម្បីដាក់ឱ្យចូលរួមប្រកួត នៅវគ្គពាក់កណ្តាលផ្តាច់ព្រ័ត្រ។
ជាមួយគ្នានេះ ក្រុមម្ចាស់ផ្ទះកម្ពុជា ជាពិសេសអ្នកគាំទ្រ បាននឹងកំពុងបន់ស្រន់ឱ្យក្រុមវៀតណាម ធ្វើយ៉ាងណា យកឈ្នះក្រុមថៃ ជាមួយគ្រាប់បាល់ឱ្យបានច្រើន ព្រោះបើសិនជា ក្រុមវៀតណាម អាចយកឈ្នះក្រុមថៃ ចាប់ពី៣គ្រាប់ ឬ ៣-០ ឡើង នោះក្រុមកម្ពុជា នឹងអាចក្លាយជាក្រុមលេខ២ល្អ ដើម្បីបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ ដែរ។
ផ្ទុយពីនេះ បើសិនជាក្រុមទាំង២ ស្មើគ្នា ឬអាចយកឈ្នះចាញ់ក្រុមត្រឹម ១-០ នោះកម្ពុជា នឹងធ្លាក់ចេញពីការប្រកួតនេះហើយ ចំណែក វៀតណាម និងថៃ នឹងត្រូវឡើងទៅប្រកួតវគ្គបន្ត ដូចគ្នា ដើម្បីជួបក្រុមលេខ១ពូលA ទីម័រខាងកើត និងក្រុមឡាវ ដែលទើបបានយកឈ្នះក្រុមម៉ាឡេស៊ី ២-២ ជាលើកទី២ កាលពីយប់មិញ បន្ថែមទៅលើការឈ្នះ ២-១ កាលប្រកួតជើងទី១ ដើម្បីទទួលបានលេខ១ ប្រចាំពូលB៕