ក្រុមជម្រើសជាតិសិង្ហបុរីអាយុក្រោម២៣ឆ្នាំ នឹងត្រូវប្រកួតបើកឆាកប្រចាំពូលC នៃពានរង្វាន់ AFF U23 Championship 2022 នៅកីឡដ្ឋានព្រីនស៍របស់ក្លិបវិសាខា នាយប់ម៉ោង៧ ថ្ងៃពុធនេះ គឺស្របពេលដែល ម្ចាស់ផ្ទះកម្ពុជា និងសហព័ន្ធកីឡាបាល់ទាត់អាស៊ីអាគ្នេយ៍ បានកែបែ និងផ្លាស់ប្តូរពេលវេលាប្រកួតនៃព្រឹត្តិការណ៍នេះ មួយចំនួន បន្ទាប់ពីក្រុមមីយ៉ាន់ម៉ា បានដកខ្លួនចេញភ្លាមៗ ដោយសារសមាជិកពួកគេមួយចំនួន បានតេស្តរកឃើញវិជ្ជមានជំងឺកូវីដ១៩។
គេនៅចាំបានថា សម្រាប់ការប្រកួតពានរង្វាន់ AFF Suzuki Cup កាលពីពេលថ្មីនេះ ក្រុមជម្រើសជាតិថៃ បានយកឈ្នះក្រុមម្ចាស់ផ្ទះសិង្ហបុរី ២-០ ដើម្បីទទួលបានចំណាត់ថ្នាក់លេខ១ ប្រចាំពូលA រួចបានបន្តទៅទម្លាក់ក្រុមវៀតណាម នៅវគ្គពាក់កណ្តាលផ្តាច់ព្រ័ត្រ និងឈ្នះក្រុមឥណ្ឌូនេស៊ី នៅវគ្គផ្តាច់ព្រ័ត្រ ដើម្បីលើកពានយ៉ាងរំភើប នៅចំពោះមុខមុខអ្នកគាំទ្រយ៉ាងច្រើនរបស់សិង្ហបុរី និងក្រុមសិង្ហបុរី ដែលបានធ្លាក់ត្រឹមវគ្គពាក់កណ្តាលផ្តាច់ព្រ័ត្រ ដ៏គួរសោកស្តាយ ក្រោយចាញ់ក្រុមឥណ្ឌូនេស៊ី។
ជាមួយហេតុផលនេះ ក្រុមសិង្ហបុរី នឹងប្រើការប្រកួត នៅលើទឹកដីកម្ពុជា នាយប់នេះ ដើម្បីជម្រះបញ្ជីជាមួយក្រុមជម្រើសជាតិថៃ នៅមុនពេលក្រុមទាំង២នេះ ត្រូវបន្តទៅជួបក្រុមខ្លាំង វៀតណាម ដើម្បីស្វែងរកក្រុមលេខ១ ឡើងទៅវគ្គពាក់កណ្តាលផ្តាច់ព្រ័ត្រ ជាមួយក្រុមលេខ១ មកពីពូលA និងពូលB រួមទាំងក្រុមលេខ២ល្អ ចំនួន១ក្រុមទៀត។
ជាមួយគ្នានេះ ក្រុមសិង្ហបុរី ត្រូវបានគេមើលឃើញថា មានភាគរយច្រើន ក្នុងការដណ្តើមបាន៣ពិន្ទុ ព្រោះសម្រាប់ការប្រកួតពានរង្វាន់ AFF U23 Championship 2022 នៅកម្ពុជា លើកនេះ ថៃ បានសម្រេចបញ្ជូនក្រុមU19ជម្រើសជាតិ មកប្រកួតជំនួសក្រុមU23ជម្រើសជាតិ ដែលពួកគេ មានការមមាញឹកខ្លាំង ក្នុងការជួយក្លិបរៀងៗខ្លួន នៅការប្រកួតលីគកំពូល នៅប្រទេសថៃ។
ទន្ទឹងនេះ សហព័ន្ធកីឡាបាល់ទាត់កម្ពុជា (FFC) ដែលជាម្ចាស់ផ្ទះ និង AFF បានសម្រេចកែប្រែពេលវេលានៃការប្រកួតមួយចំនួន បន្ទាប់ពីក្រុមU23ជម្រើសជាតិមីយ៉ាន់ម៉ា បានដកខ្លួន កាលពីម្សិលមិញ ហើយការដកខ្លួនភ្លាមៗនេះ បានធ្វើឱ្យការប្រកួតប្រជែងនៅពូលB មានត្រឹម១ប្រកួត ដែលជាការប្រជែងគ្នាយកលេខ១រវាងក្រុមម៉ាឡេស៊ី និងក្រុមឡាវ ខណៈពូលA នៅសល់៤ក្រុមដដែល និងពូលC មាន៣ក្រុម ក្រោយក្រុមការពារជើងឯកឥណ្ឌូនេស៊ី បានដកខ្លួន តាំងពីការប្រកួតចាប់ផ្តើម ដោយសារការតេស្តរកឃើញអ្នកឆ្លងជំងឺកូវីដ នៅក្នុងក្រុមដូចគ្នា៕