ក្រុមគ្រូបង្វឹកក្រុមជម្រើសជាតិកម្ពុជាអាយុក្រោម២៣ឆ្នាំ បានសម្រេចមិនទាន់ជម្រុះបេក្ខភាពចំនួន៨ទៀត ចេញពីបេក្ខភាពទាំង៣៦នាក់ ដែលបានជាប់នៅការធ្វើតេស្តដំណាក់កាលទី២ នៅឡើយទេ គឺអ្នកទាំងនេះ នឹងត្រូវហ្វឹកហាត់ជុំគ្នាជាបន្តទៀត រហូតដល់ចុងសប្តាហ៍នេះ ទើបធ្វើការជម្រុះយក២៨នាក់ចុងក្រោយ ដើម្បីដាក់ឱ្យចូលរួមប្រកួតជើងឯកបាល់ទាត់តំបន់អាស៊ីអាគ្នេយ៍ អាយុក្រោម២៣ឆ្នាំ (AFF U23 Championship 2022) ដែលកម្ពុជា ត្រូវធ្វើជាម្ចាស់ផ្ទះ។
តាមគម្រោង ការធ្វើតេស្តដំណាក់កាលទី២របស់កីឡាករទាំង៣៦នាក់នេះ ត្រូវបានបញ្ចប់ ត្រឹមថ្ងៃអង្គារ ម្សិលមិញ ហើយក៏ជាពេល ត្រូវជម្រុះកីឡាករ៨នាក់ទៀតចេញ ដោយទុកត្រឹម២៨នាក់ ដើម្បីបន្តហ្វឹកហាត់ នៅក្នុងដំណាក់កាលទី៣ ចុងក្រោយនេះ ផងដែរ ប៉ុន្តែការសម្រេចចុងក្រោយ កាលពីម្សិលមិញ គឺបានដាក់អ្នកទាំង៣៦នេះ ឱ្យបន្តហ្វឹកហាត់ជុំគ្នា រហូតដល់ចុងសប្តាហ៍នេះ ទើបធ្វើការប្រកួតជម្រុះចុងក្រោយ។
ការលើកពេលនៃការជម្រុះបេក្ខភាពទាំង២៨នាក់ចុងក្រោយនេះ ត្រូវបានលោក ភា សុភ័ក្រ្តា គ្រូជំនួយក្រុមជម្រើសជាតិកម្ពុជា បានឱ្យដឹងថា គឺដើម្បីទុកពេលឱ្យកីឡាករ ទើបបានជាប់ នៅក្នុងក្រុមជម្រើសជាតិ បានធ្វើការហ្វឹកហាត់ ជាមួយអ្នកចាត់ការទូទៅក្រុមជម្រើសជាតិកម្ពុជា លោក Keisuke Honda ដែលត្រូវមកដល់ប្រទេសកម្ពុជា នៅថ្ងៃពុធនេះ។
លោក ភា សុភ័ក្រ្តា បានប្រាប់កាសែតក្នុងស្រុកមួយ កាលពីរសៀលថ្ងៃអង្គារថា៖ «ក្រុមការងារ កំពុងពិចារណារសម្រេចពីការកំណត់ពេលវេលាការជម្រុះកីឡាករទាំង៣៦នាក់នេះ គឺប្រហែលជាលើកពេល ដល់ថ្ងៃទី១១ ឬ ថ្ងៃទី១២ ខែកុម្ភៈ ហើយការពន្យារពេលនេះ គឺយើងចង់ទុកពេលវេលាឱ្យពួកគាត់ និងលើកទឹកចិត្តដល់ពួកគាត់ ជាពិសេសអ្នកទើបជាប់ថ្មី មានពេលវេលាហ្វឹកហាត់ជាមួយលោក ហុងដា»។
គួរបញ្ជាក់ថា លោក Keisuke Honda នឹងដឹកនាំក្រុមកម្ពុជា ដោយផ្ទាល់ នៅក្នុងការប្រកួតពានរង្វាន់ AFF U23 Championship 2022 នេះ ដោយក្នុងនោះ ក្រុមកម្ពុជា ត្រូវប្រកួតបើកឆាកជាមួយក្រុមU23ប្រ៊ុយណេ នៅថ្ងៃទី១៤ រួចបន្តទៅជួបក្រុមហ្វីលីពីន នៅថ្ងៃទី១៧ និងប៉ះក្រុមទីម័រខាងកើត នៅថ្ងៃទី២០ ខែកុម្ភៈ។
សម្រាប់ការប្រកួតជម្រុះសន្សំពិន្ទុទាំង៣លើករបស់ក្រុមកម្ពុជានេះ ត្រូវធ្វើឡើង នៅពហុកីឡដ្ឋានជាតិមរតកតេជោ ទាំងអស់ ដោយចាប់ផ្តើមពីយប់ម៉ោង៧តទៅដូចគ្នា ចំណែកការប្រកួតគូផ្សេងទៀត ទាំងនៅពូលA ពូលB និងពូល C គឺគូខ្លះធ្វើនៅពហុកីឡដ្ឋានជាតិមរតកតេជោ រីឯគូខ្លះទៀត ធ្វើនៅកីឡដ្ឋានព្រីនស៍ ដោយចាប់ផ្តើមពីថ្ងៃទី១៤ និងបញ្ចប់នៅថ្ងៃទី២៦ ខែកុម្ភៈ ឆ្នាំ២០២២៕
