បរទេស៖ ខ្សែប្រយុទ្ធ Romelu Lukaku រកបានគ្រាប់បាល់ឈ្នះ ខណៈដែលក្រុម Chelsea បានផ្តួលក្រុមអារ៉ាប៊ីសាអ៊ូឌីត Al Hilal ក្នុងលទ្ធផល ១-០ កាលពីថ្ងៃពុធ ដើម្បីឈានទៅប្រកួតដណ្តើមពាន Club World Cup វគ្គផ្តាច់ព្រ័ត្រជាមួយនឹងក្រុមម្ចាស់ជើងឯកទ្វីបអាមេរិកខាងត្បូង Palmeiras។
ខ្សែប្រយុទ្ធដែលមានតម្លៃខ្លួនថ្លៃបំផុតរបស់ក្លិប Chelsea រូបនេះ មិនបានរកគ្រាប់បាល់បញ្ចូលទី៥ប្រកួតជាប់ៗគ្នា នៅមុនពេលធ្វើដំណើរទៅដល់ទីក្រុងអាប៊ូដាប៊ី ហើយក្រុមតោខៀវ ចង់ឲ្យតារាឆ្នើមវ័យ២៨ឆ្នាំរូបនេះ រកឲ្យឃើញទម្រង់លេងដ៏ល្អបំផុតរបស់គេ នៅពាក់កាលរដូវកាលចុងក្រោយនេះ។ ខ្សែប្រយុទ្ធអន្តរជាតិបែលហ្ស៊ិក Lukaku បានស៊ុតបាល់បញ្ចូលទីយ៉ាងល្អនៅនាទី ទី៣៣ ក្រោយពីការធ្វេសប្រហែសនៅតំបន់ការពារ ដើម្បីជួយឲ្យក្រុម Chelsea ឈានទៅប្រកួតក្នុងវគ្គផ្តាច់ព្រ័ត្រនៅថ្ងៃសៅរ៍ ដែលជាការជួបគ្នាជាលើកទី២ ក្នុងរយៈពេល៣ឆ្នាំរវាងក្រុមអង់គ្លេស និងក្រុមរបស់ប្រេស៊ីល។
Chelsea អាចចូលរួមជាមួយនឹងក្រុម Manchester United និង Liverpool ក្នុងនាមជាក្រុមទី៣របស់អង់គ្លេស ដែលបានឈ្នះពាន Club World Cup ក្រោយពីបានបញ្ចប់ក្នុងនាមជាក្រុមជើងឯករង ដោយសារតែការចាញ់ក្រោមស្នាដៃក្រុម Corinthians ក្នុងការបង្ហាញខ្លួនជាលើកដំបូងរបស់ពួកគេ កាលពីឆ្នាំ២០២២។ ពួកគេប្រហែលជាមិនមានលោកគ្រូបង្វឹក Thomas Tuchel នៅក្បែរទីលានប្រកួតឡើយ នៅចុងសប្តាហ៍នេះ ស្របពេលដែលគ្រូបង្វឹកសញ្ជាតិអាល្លឺម៉ង់រូបនេះ នៅតែត្រូវដាក់ខ្លួនឲ្យនៅដាច់ដោយឡែក នៅឡើយ ក្រោយពីពិនិត្យឃើញជាវេជ្ជមានលើវីរុសកូវីដ ១៩៕
ប្រភពព័ត៌មាន៖ Channel News Asia
