លោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ដែលជាប្រធានគណៈកម្មាធិការជាតិរៀបចំការប្រកួតស៊ីហ្គេម លើកទី៣២ ឆ្នាំ២០២៣ (CAMSOC) បានជំរុញឱ្យគ្រប់ភាគីពាក់ព័ន្ធ ត្រូវតែខំប្រឹងបំពេញការងារឱ្យបានពេញលេង ទៅតាមជំនាញ និងតួនាទីរបស់ខ្លួន ហើយមិនត្រូវផ្តេកផ្តួល ឬដាក់កំហុស តែទៅលើបញ្ហាជំងឺកូវីដ១៩ នាំឱ្យបាត់បង់ម្ចាស់ការ ក្នុងការឈានទៅធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ២០២២ នោះទេ។
លោក ទៀ បាញ់ បានទទួលស្គាល់ថា ការរីកដាលនៃជំងឺកូវីដ១៩ ពិតជាបានរំខាន និងពន្យឺតទៅដល់ផែនការសកម្មភាព ឆ្ពោះទៅស៊ីហ្គេម ឆ្នាំ២០២៣ ពិតមែន ប៉ុន្តែលោកបានជំរុញទៅគ្រប់ផ្នែក ត្រូវរួមគ្នាពុះពារ គឺមិនត្រូវផ្តេកផ្តួលនោះឡើយ។ «ស្ថានភាពជំងឺកូវីដ១៩ និងការបំប្លែងថ្មីនៃវីរុសអូមីក្រុង នៅតែស្ថិតក្នុងភាពមិនច្បាស់លាស់ ដែលបានរំខាន និងពន្យឺតផែនការសកម្មភាព ក្នុងដំណាក់កាលប្រតិបត្តិការណ៍ស៊ីហ្គេម ដូចជាការហ្វឹកហ្វឺន ការប្រកួត សុទ្ធតែជួបឧបសគ្គ ជាពិសេសគុណផលកីឡា»។
ប្រធាន CAMSOC រូបនេះ បានបបន្ថែមថា៖ «ចំណែកទីលានប្រមូលផ្តុំហ្វឹកហាត់ ឧបករណ៍ និងសម្ភារហ្វឹកហាត់ នៅមានកម្រិត ឯទីលានប្រកួតរបស់កីឡាមួយចំនួន មិនទាន់ស្របតាមស្តង់ដារ ដែលធ្វើឱ្យជួបប្រទះការលំបាកក្នុងការបង្វឹក ហើយការហ្វឹកហ្វឺន នៅមានកម្រិត ដោយការបញ្ជូនក្រុមអត្តពលិកទៅហ្វឹកហាត់ នៅក្រៅប្រទេស មិនទាន់បានធ្វើតាមផែនការ»។
តែទោះយ៉ាងណា លោក ទៀ បាញ់ បានបញ្ជាក់ថា៖ «ទាំងអស់នេះ សុទ្ធតែបានជះឥទ្ធិពលដល់គុណផលកីឡា តម្រូវឱ្យយើង រួមគ្នាដោះស្រាយ តាមគោលការណ៍ណែនាំរបស់រាជរដ្ឋាភិបាល និងគោលការណ៍ជំនាញបច្ចេកទេសកីឡា ដោយយើងមិនត្រូវផ្តេកផ្តួល ឬដាក់កំហុស តែលើបញ្ហាជំងឺកូវីដ១៩ ហើយបាត់បង់ម្ចាស់ការ ក្នុងការទទួលខុសត្រូវ លើការងាររបស់ CAMSOC នោះឡើយ»។
ការថ្លែងបែបនេះ របស់លោក ទៀ បាញ់ ត្រូវបានធ្វើឡើង នៅក្នុងសន្និបាតបូកសរុបវឌ្ឍនភាពការងារ ឆ្នាំ២០២១ លើកទិសដៅបន្ត ឆ្នាំ២០២២-២០២៣ និងសិក្ខាសាលាថ្នាក់ជាតិ ស្តីពីអភិបាលកិច្ចល្អ នៃការគ្រប់គ្រងព្រឹត្តិការណ៍កីឡាស៊ីហ្គេម-អាស៊ានប៉ារាហ្គេម ឆ្នាំ២០២៣ នៅសណ្ឋាគារសុខាភ្នំពេញ កាលពីថ្ងៃពុធ ហើយក៏ជាពេលដែលលោកទាមទារឱ្យគ្រប់ភាគី ត្រូវតែហ៊ានទទួលខុសត្រូវ ចំពោះតួនាទីរបស់ខ្លួន ក្នុងការឆ្ពោះទៅស៊ីហ្គេម ឆ្នាំ២០២៣ ផងដែរ។
លោកបានសង្កត់ធ្ងន់ថា៖ «សន្និបាត និងសិក្ខាសាលា នៅថ្ងៃនេះ គ្រប់ភាគីពាក់ព័ន្ធ នឹងស្វែងរកគន្លឹះការងារសំខាន់ៗបន្ថែមទៀត ដែលជាធាតុចូលដ៏មានសារសំខាន់ និងផ្ដល់នូវប្រសិទ្ធភាពការងារគ្រប់ជ្រុងជ្រោយ របស់គណៈកម្មាធិការជាតិ CAMSOC។ ដូច្នេះទិសដៅ ឆ្នាំ២០២២ ជាឆ្នាំប្រតិបត្តិការរៀបចំស៊ីហ្គេម-អាស៊ានប៉ារ៉ាហ្គេមរបស់យើង ដែលទាមទារឱ្យគ្រប់ភាគីពាក់ព័ន្ធទាំងអស់ ត្រូវមានភាពប្រាកដនិយម ទទួលខុសត្រូវខ្ពស់បំផុត ចំពោះមុខ CAMSOC ចំពោះមុខរាជរដ្ឋាភិបាល និងចំពោះមុខសហព័ន្ធក្រុមប្រឹក្សាកីឡាអាស៊ីអាគ្នេយ៍»៕
