លោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានឈានដល់ការសម្រេច ជាមួយអង្គសន្និបាត ទៅលើផែនការអភិវឌ្ឍជំនាញ ដោយឱ្យសសរស្តម្ភទាំង៣ ត្រូវរួមគ្នាជំរុញការអភិវឌ្ឍសមត្ថភាព គុណភាព និងគុណផលកីឡាករកីឡាការិនីជម្រើសជាតិ ដើម្បីធ្វើឱ្យមានភាពប្រាកដប្រជា ថា កម្ពុជា ពិតជាអាចទទួលបានជោគជ័យ សម្រាប់ការធ្វើម្ចាស់ផ្ទះស៊ីហ្គេម ជាប្រវត្តិសាស្រ្ត នៅឆ្នាំ២០២៣។
«ផែនការអភិវឌ្ឍជំនាញ សូមសសរស្ដម្ភទាំងបី រួមមានក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិ ត្រូវរួមគ្នាជំរុញការអភិវឌ្ឍសមត្ថភាព គុណភាព និងគុណផលកីឡាករ-កីឡាការិនីជម្រើសជាតិ ដោយធានាយ៉ាងគត់មត់ថា កីឡាករ កីឡាការិនី ពិតជាបានហ្វឹកហាត់ទៀងទាត់បំផុត និងបានចូលរួមការប្រកួតលើឆាកអន្ដរជាតិញឹកញាប់ ដើម្បីទទួលបានកម្រិតបច្ចេកទេសជំនាញ និងមានឧត្តមភាពបច្ចេកទេសកីឡាពិតប្រាកដ»។
ប្រធាន CAMSOC លោក ទៀ បាញ់ បានថ្លែងបែបនេះ នៅក្នុងពិធីបិទសន្និបាតបូកសរុបលទ្ធផលការងារ ឆ្នាំ២០២១ និងលើកទិសដៅឆ្នាំ២០២២-២០២៣ និងសិក្ខាសាលាថ្នាក់ជាតិ ស្ដីពីអភិបាលកិច្ចល្អ នៃការគ្រប់គ្រងព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ កាលពីថ្ងៃទី១០ ខែកុម្ភៈ ក្រោយការរៀបចំរយ:១ថ្ងៃកន្លះ នៅសណ្ឋាគារសុខា ដែលមានថ្នាក់ដឹកនាំ អាជ្ញាធររាជធានី-ខេត្ត អង្គភាពកីឡា និងតំណាងសហព័ន្ធកីឡាជាតិ ចូលរួមប្រមាណ ៣០០នាក់។
លោក ទៀ បាញ់ បានបន្ថែមថា៖ «ករណីនេះ យើងត្រូវពិនិត្យ និងដោះស្រាយរាល់បញ្ហារបស់កីឡាករ កីឡាការិនី គ្រូបង្វឹក សហព័ន្ធកីឡាជាតិ ទៅលើការឧបត្ថម្ភគាំទ្រ ការលើកទឹកចិត្ត និងការរៀបចំឧបករណ៍ សម្ភារកីឡា ទីលានហ្វឹកហាត់ តាមស្ដង់ដារបច្ចេកទេសកីឡាអន្ដរជាតិ និងវិទ្យាសាស្ដ្រកីឡាបច្ចុប្បន្ន។ រីឯផ្នែកហិរញ្ញវត្ថុ និងផ្គត់ផ្គង់ ត្រូវតាមដាន និងរៀបចំគម្រោងថវិកាឱ្យបានច្បាស់លាស់ ទាន់ពេលវេលា និងគ្រប់គ្រាន់ ដើម្បីទ្រទ្រង់ដល់តម្រូវការចាំបាច់ ក្នុងការអភិវឌ្ឍជំនាញកីឡាកម្រិតខ្ពស់ខាងលើនេះ»។
ជាមួយគ្នានេះ CAMSOC ក៏នឹងស្នើសុំទៅរាជរដ្ឋាភិបាលកម្ពុជា ដើម្បីបង្កើនរបបអាហារប្រចាំថ្ងៃដល់ក្រុមជម្រើសជាតិ ផងដែរ។ «យើងនឹងស្នើសុំរាជរដ្ឋាភិបាល ស្វែងរកដំណោះស្រាយបញ្ហាហ្វឹកហាត់របស់កីឡាករ កីឡាការិនីជម្រើសជាតិ ដោយការបង្កើនរបបអាហារបំប៉នប្រចាំថ្ងៃឱ្យឡើងដល់ ៦ម៉ឺនរៀល ក្នុងមួយថ្ងៃ សម្រាប់ម្នាក់ ដែលអាចបំពេញកាឡូរីបាន ពី ៥០០០ ទៅ ៦០០០កាឡូរី»។ នេះជាការបញ្ជាក់ នៅក្នុងរបាយការណ៍បូកសរុបការងាររបស់ CAMSOC ដែលអានដោយលោករដ្ឋមន្រ្តី ថោន ខុន ដែលជាអនុប្រធានអចិន្ត្រៃ CAMSOC នៅក្នុងពិធីបិទសន្និបាត នោះដែរ៕
