ក្រុមហ៊ុនលីគបាល់ទាត់កម្ពុជា បានបង្ហាញនូវ ឡូហ្គោថ្មី នៃការប្រកួតលីគកំពូលកម្ពុជា ឬ Cambodian Premier Leage (CPL) និងលីក២ (Cambodia League 2) សម្រាប់រដូវកាល ឆ្នាំ២០២២នេះ ជាផ្លូវការហើយ ដោយមានតំណាងក្លិបកំពូលទាំង៨ បានចូលរួម កាលពីថ្ងៃព្រហស្បតិ៍ ម្សិលមិញ។
សម្រាប់ឡូហ្គោថ្មីនេះ ត្រូវដាក់ឱ្យប្រើប្រាស់រួមគ្នា ទាំងការប្រកួតលីគកំពូលកម្ពុជា និងលីគ២ គ្រាន់តែមានពណ៌ខុសគ្នា គឺលីគកំពូល ប្រើពណ៌ក្រហម ចំណែកលីគ២ ប្រើពណ៌បៃតង ចំណែកពណ៌ខ្មៅ ជាពណ៌តំណាងនៃនិមិត្តសញ្ញា ហើយតាមការបកស្រាយរបស់លោក Satoshi Saito គឺពណ៌ទាំង៣នេះ សុទ្ធមានអត្ថន័យខុសៗគ្នា ដែលសំដៅទៅលើភាពមោះមុត និងការអភិវឌ្ឍឱ្យមានភាពរីកចម្រើន ក្នុងវិស័យបាល់ទាត់ នៅកម្ពុជា។
លោក Satoshi Saito នាយកប្រតិបត្តិនៃក្រុមហ៊ុនលីគកំពូលកម្ពុជា បានធ្វើការបកស្រាយនៃអត្ថន័យពណ៌ទាំង៣នេះថាពណ៌ខ្មៅ ជានិមិត្តសញ្ញាតំណាងឱ្យសាជីវកម្ម និងការយល់ឃើញនៃគំនិតឆ្នៃប្រឌិតថ្មីៗ ចំណែកពណ៌ក្រហមនៃលីគទី១ ត្រូវបានបំផុសគំនិតដោយទង់ជាតិកម្ពុជា ហើយក៏ជាសញ្ញានៃព្រះអាទិត្យរះ និងការតាំងចិត្ត។ រីឯពណ៌បៃតងនៃលីគទី២ តំណាងឱ្យយុវជន ការដុះពន្លកនៃដើមឈើ និងអ្វីៗ ដែលចាប់ផ្តើមថ្មី។
លោកបានបញ្ជាក់ថា៖«លើសពីនេះទៅទៀតរូបស្រមោលទាំងអស់ នៅក្នុងរូបសញ្ញាត្រូវបានបំផុសគំនិត ដោយរូបស្រមោលរបស់ខ្មែរ បន្ថែមពីលើនិមិត្តរូបនៃទឹកដីកម្ពុជា ហេតុនេះ យើងសង្ឃឹមយ៉ាងមុតមាំ ថា និមិត្តសញ្ញានេះ នឹងក្លាយជានិមិត្តសញ្ញានៃភាពមោះមុត និងសេចក្តីស្រឡាញ់ ចំពោះ CPL សម្រាប់អ្នកគាំទ្របាល់ទាត់កម្ពុជាទាំងអស់ ដោយយើងនឹងបង្កើតយុគសម័យថ្មីនៃបាល់ទាត់កម្ពុជា ក្រោមការដឹកនាំរបស់សហព័ន្ធកីឡាបាល់ទាត់កម្ពុជា»។
បន្ថែមទៅលើការបង្ហាញពីអត្ថន័យ នៅក្នុងនិមិត្តសញ្ញា ឬហៅថា ឡូហ្គោ នេះ បុរសជនជាតិជប៉ុន លោក Satoshi Saito ក៏បានបង្ហាញពីគោលដៅចម្បង នៃការមកដឹកនាំក្រុមហ៊ុនលីគបាល់ទាត់កម្ពុជា នេះផងដែរ ដោយបានលោកបានដាក់ទិសដៅសំខាន់ៗ ដើម្បីធ្វើឱ្យបាល់ទាត់នៅកម្ពុជា មានការផ្លាស់ប្តូរ និងក្លាយជាលីគអាជីពដ៏លេចធ្លោរមួយ នៅក្នុងតំបន់អាស៊ាន។
លោក Satoshi Saito បានដាក់គោលដៅរួចហើយថា ការមកជួយជ្រោមជ្រែងបាល់ទាត់ នៅកម្ពុជា ជាលើកដំបូងនេះ គឺលោកធ្វើយ៉ាងណាឱ្យមានក្រុម ចេញពីលីគកំពូលកម្ពុជា បានទៅលេង នៅក្នុងការប្រកួតពាន AFC Champions League នៅត្រឹមឆ្នាំ២០២៥ ព្រមួទាំងជួយឱ្យក្រុមជម្រើសជាតិកម្ពុជា ទទួលបានជោគជ័យ នៅក្នុងការប្រកួតស៊ីហ្គេម លើកទី៣២ ឆ្នាំ២០២៣ នៅកម្ពុជា ធ្វើជាម្ចាស់ផ្ទះ លើកដំបូង ជាប្រវត្តិសាស្រ្ត។
អ្វីដែលកាន់តែពិសេសនោះ លោក Satoshi Saito បានអះអាងថា៖«នៅក្នុងផែនការ និងការដាក់គោលដៅរបស់យើង គឺយើងនឹងធ្វើឱ្យ កម្ពុជា បានក្លាយជាក្រុមកំពូលតារាងទាំង៤ ក្នុងពាន Asian Cup Final នៅត្រឹមឆ្នាំ២០២៧ ពិសេស កម្ពុជា នឹងក្លាយជាក្រុមជម្រើសជាតិ ដ៏ជោគជ័យមួយ ចេញពីតំបន់អាស៊ាន ដើម្បីបានទៅចូលលេងនៅក្នុងការប្រកួត បាល់ទាត់ពិភពលោ នៅឆ្នាំ២០៣០»៕