ក្រុមជម្រើសជាតិកម្ពុជាអាយុក្រោម២៣ឆ្នាំ បានដាក់គោលដៅយ៉ាងប្រាកដថា ត្រូវស្វែងរកឱ្យបាននៅលទ្ធផលដ៏ល្អមួយ សម្រាប់ការប្រកួតបើកឆាកប្រចាំពូលA នៃពានរង្វាន់ AFF U23 Championship នៅពហុកីឡដ្ឋានជាតិមរតកតេជោ នាយប់ម៉ោង៧ ថ្ងៃចន្ទនេះ គឺមុនពេលការជួបគ្នារវាងក្រុមហ្វីលីពីន និងទីម័រខាងកើត ដែលធ្វើនៅរសៀលម៉ោង ៤ តទៅ។
គ្រូបង្គោលក្រុមជម្រើសជាតិកម្ពុជា លោក Hirose Ryu បានអះអាងថា ការប្រកួតពានរង្វាន់ AFF U23 Championship 2022 នេះជាការឱកាសដ៏ល្អបំផុត សម្រាប់កីឡាករវ័យក្មេងរបស់កម្ពុជា បានបង្ហាញខ្លួន និងបញ្ចេញសមត្ថភាព បានពេញលេញ ខណៈការប្រកួត២ឆ្នាំកន្លងមកនេះ ពួកគេ បានប្រឈមនៅការលំបាក ក្នុងការដាក់ឱ្យលេងជាមួយក្រុមធំជម្រើសជាតិកម្ពុជា ដែលត្រូវប្រកួតប្រជែងជាមួយក្រុមធំជម្រើសជាតិ ផ្សេងទៀត អាចមានកម្រិតលើពួកគេ។
តែទោះបីជាយ៉ាងណា សម្រាប់ការប្រកួតនេះ គឺជាពេលវេលាដ៏ល្អបំផុត ដែលនពួកគេ អាចប្រកួតប្រជែង នៅក្នុងកម្រិតអាយុពិតប្រាកដរបស់ពួកគេ ហើយនេះក៏ជាការប្រកួតដ៏សំខាន់ ក្នុងការពង្រឹងសមត្ថភាពរបស់ពួកគេបន្ថែមទៀត ដើម្បីត្រៀមទៅកាន់ការប្រកួតស៊ីហ្គេម ជាពិសេសស៊ីហ្គេម ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ។
គ្រូបង្គោលជនជាតិជប៉ុន លោក Hirose Ryu ដែលត្រូវចូលរួមដឹកនាំក្រុមជម្រើសជាតិកម្ពុជា ជាមួយអ្នកចាត់ការទូទៅ លោក Keisuke Honda នោះ បាននិយាយថា៖«យើង នឹងស្វែងរកលទ្ធផលដ៏ល្អ នៅក្នុងការប្រកួតនេះ ព្រោះថា នេះនឹងក្លាយជាការរៀបចំដ៏ល្អសម្រាប់ស៊ីហ្គេម ដែលកម្ពុជានឹងធ្វើជាម្ចាស់ផ្ទះ នៅឆ្នាំ២០២៣»។
យ៉ាងណាក៏ដោយ សម្រាប់ការប្រកួតនេះ គ្រូបង្វឹកក្រុមU23ជម្រើសជាតិប្រ៊ុយណេ បានបង្ហាញថា ក្រុមរបស់លោក នឹងមានអ្វីប្លែក ដើម្បីប្រឆាំងនឹងមហិច្ឆតាស្វែងរក៣ពិន្ទុរបស់ក្រុមកម្ពុជា ហើយលោកថា ការលេងទល់នឹងក្រុមម្ចាស់ផ្ទះកម្ពុជា លើកនេះ ពិតជាត្រូវបានសាកល្បងលើកដំបូង បន្ទាប់ពីបានផ្អាកអស់រយៈពេល២ឆ្នាំ ពីការប្រកួតអន្តរជាតិ។
លោក Aminuddin Jumat គ្រូបង្វឹកក្រុមប្រ៊ុយណេ បាននិយាយថា៖ «យើងត្រូវអរគុណសហព័ន្ធកីឡាបាល់ទាត់អាស៊ីអាគ្នេយ៍ និងសហព័ន្ធកីឡាបាល់ទាត់កម្ពុជា ដែលបានធ្វើឱ្យការប្រកួតនេះ ដំណើរការទៅរួច ព្រោះយើងមិនបានចូលរួម ក្នុងការប្រកួតអន្តរជាតិណាមួយអស់រយៈពេល២ឆ្នាំមកហើយ។ យើងមានក្រុមកីឡាករក្មេងៗ ហើយនេះនឹងក្លាយជាការបង្ហាញដ៏ល្អ សម្រាប់ពួកគេ ដោយយើងសង្ឃឹមថា យើងអាចធ្វើអ្វីមួយប្រឆាំងនឹងកម្ពុជា»។
ជាមួយគ្នានេះ ក្រុមឈរនៅពូលAជាមួយគ្នា ទីម័រខាងកើត និងហ្វីលីពីន នឹងក្លាយជាក្រុមដំបូងគេ ដែលបានលេងនៅពហុកីឡដ្ឋានជាតិមរតកតេជោ មុនគេ ដោយក្រុមទាំង២នេះ ត្រូវប្រកួតគ្នា នៅរសៀលម៉ោង៤ ថ្ងៃចន្ទនេះដែរ ហើយគ្រូបង្វឹកក្រុមហ្វីលីពីន លោក Stewart Hall បាននិយាយ ក្នុងសន្និសីទកាសែត កាលពីថ្ងៃអាទិត្យថា យើងបានត្រៀមខ្លួនរួចហើយសម្រាប់ការប្រកួតទាំងអស់ក្នុងពូលAនេះ ដោយពួកគេបានបង្ហាញភាពស្រេកឃ្លានខ្លាំង ហើយចង់ធ្វើឱ្យបានល្អ ក្នុងការប្រកួត ដើម្បីខ្លួនពួកគេផ្ទាល់៕
