ការរកបានត្រឹម១គ្រាប់របស់កីឡាករមានវ័យក្មេងជាងគេ ស៊ិន សុវណ្ណមករា បានជួយឱ្យក្រុមជម្រើសជាតិកម្ពុជាអាយុក្រោម២៣ឆ្នាំ យកឈ្នះក្រុមU23ជម្រើសជាតិហ្វីលីពីន ១-០ ទាំងលំបាក នៅក្នុងការប្រកួតជម្រុះលើកទី២ប្រចាំពូលA នៃពានរង្វាន់ AFF U23 Championship 2022 កាលពីថ្ងៃព្រហស្បតិ គឺស្របពេលក្រុមទីម័រខាងកើត បានយកឈ្នះក្រុមប្រ៊ុយណេ ៣-១។
សម្រាប់ការប្រកួត ដែលធ្វើនៅកីឡដ្ឋានជាតិមរតកតេជោនេះ ក្រុមកម្ពុជា និងហ្វីលីពីន បានប្រកួតគ្នាយ៉ាងស្វិតស្វាញបំផុត។ ក្រុមទាំង២នេះ បានធ្វើការវាយបកសងគ្នា និងបង្កើតបានឱកាសដូចៗគ្នា តែទោះបីជាយ៉ាងណា វាមានត្រឹម១គ្រាប់ប៉ុណ្ណោះ ដែលស៊ុតបានសម្រេច ហើយនោះគឺជាគ្រាប់បាល់ដ៏អស្ចារ្យរបស់កីឡាករវ័យក្មេងពាក់លេខ២៥ ស៊ិន សុវណ្ណមករា នៅនាទីទី៨១ ហើយវាក៏ជាគ្រាប់បាល់ ជួយឱ្យក្រុមគោព្រៃកម្ពុជា ទទួលបាន៣ពិន្ទុបន្ថែម ដើម្បីបន្តឈរនៅកំពូលតារាងប្រចាំពូលAនេះ ផងដែរ។
បើទោះបីជា កម្ពុជារកបានត្រឹម១គ្រាប់ ហើយជាគ្រាប់បាល់ ដែលពិបាកនឹងកើតមានឡើង គឺខុសពីការប្រកួតបើកឆាកជាមួយក្រុមប្រ៊ុយណេ ដែលកម្ពុជា បានយកឈ្នះរហូតដល់ ៦-០ ប៉ុន្តែលោក Hirose Ryu គ្រូបង្គោលក្រុមជម្រើសជាតិកម្ពុជា បានសរសើរពីសមត្ថភាពរបស់កូនក្រុម ដោយលោកបាននិយាយថា៖«វាជាការប្រកួតដ៏ស្វិតស្វាញ តែវាបានបង្ហាញពីភាពប្រសើរឡើងច្រើននៃលេងរបស់ក្រុមកម្ពុជា បើប្រៀបទៅនឹងការលេងជាមួយក្រុមប្រ៊ុយណេ កន្លងមកនេះ»។
ផ្ទុយពីនេះ គ្រូបង្វឹកក្រុមហ្វីលីពីន លោក Stewart Hall បានបង្ហាញការសោកស្តាយខ្លាំង ចំពោះការរបូត១គ្រាប់នេះ ហើយលោតបានទម្លាក់ការចាញ់ ១-០ នេះ ដោយសារកូនក្រុមរបស់លោក នៅតែមិនទាន់មានភាពរឹងមាំគ្រប់គ្រាន់ សម្រាប់ការវិលមកប្រកួត នៅលើឆាកអន្តរជាតិ ជាថ្មីនេះ។
លោក Stewart Hall បាននិយាយថា៖ «ភាពរឹងមាំរបស់កីឡាកររបស់តែងតែមានបញ្ហា ព្រោះកីឡាករខ្លះ មិនបានលេងអស់មួយរយៈពេលមកហើយ។ ពួកគេព្យាយាមបិទការប្រកួតសឹងតែបានទៅហើយ តែរបូតនៅនាទីជិតចប់ការប្រកួតទៅវិញ។ កីឡាករបានធ្វើការយ៉ាងខ្លាំងក្នុងការប្រកួតយប់នេះ ប៉ុន្តែកាយសម្បទារបស់ពួកគេ នៅតែមិនទាន់រួចរាល់នៅឡើយ»។
យ៉ាងណាមិញក្រុមទីម័រខាងកើត ដែលបានស្មើ ២-២ ជាមួយក្រុមហ្វីលីពីន កាលប្រកួតបើកឆាកនោះ បានយកឈ្នះក្រុមប្រ៊ុយណេ ៣-១ ហើយលទ្ធផលនេះ បានជួយឱ្យទីម័រខាងកើត មាន៤ពិន្ទុ និងឈរនៅលេខ២ ដោយពួកគេមានឱកាសពេញទំហឹង ក្នុងការប្រជែងដណ្តើមយកលេខ១ ជាមួយក្រុមកម្ពុជា នៅក្នុងការប្រកួតកាត់សេចក្តីលើកទី៣ចុងក្រោយ នៅថ្ងៃអាទិត្យនេះ៕
